Եվրոպայի խորհրդի գլխավոր ասամբլեայի նախագահ Անն Բրասսերն ափսոսանք է հայտնել ԵԽԽՎ-ում ռուսական պատվիրակության՝ մինչև տարեվերջ կառույցի աշխատանքներին չմասնակցելու որոշման կապակցությամբ: Այս մասին տեղեկացնում է BBC-ի ռուսական ծառայությունը:
ԵԽԽՎ-ում ռուսական պատվիրակության ղեկավարի տեղակալ Լեոնիդ Սլուցկին հաղորդել է, որ ԵԽԽՎ ղեկավարից նամակ է ստացել, որում ասվում է, որ ռուսական պատվիրակությունը 2016 թվականին չի մասնակցի կառույցի աշխատանքներին: Սլուցկին այս իրադարձությունից հետո նշել է որ Ռուսաստանը ԵԽԽՎ կվերադառանա միայն այն դեպքում, երբ կերաշխավորվի նրա պատվիրակության ամբողջական կազմի մասնակցությունը: Հիշեցնենք, որ ավելի վաղ ռուսական պատվիրակությունը հայտարարել էր մինչև 2015 թվականի ավարտը ԵԽԽՎ աշխատանքներին չմասնակցելու որոշման մասին:
Այս թեմայի մասին մեր թղթակիցը զրուցել է քաղաքագետ Հրանտ Մելիք-Շահնազարյանի հետ:
Պարո՛ն Մելիք-Շահնազարյան, ի՞նչ եք կարծում, ԵԽԽՎ-ում ռուսական պատվիրակության՝ մինչև տարեվերջ կառույցի աշխատանքներին չմասնակցելու փաստը ավելի շատ ո՞ր կողմին կվնասի. Ռուսաստանի՞ն, թե՞ ԵԽԽՎ-ին:
-Կարծում եմ՝ դա որևէ նկատելի անդրադարձ չի ունենա Ռուսաստանի վրա: Ռուսական կողմը ավելի վաղ հայտարարել էր ԵԽԽՎ-ում աշխատանքները բոյկոտելու իր որոշման մասին: Համագործակցության խնդիր կար: Ռուսական կողմը բազմիցս դժգոհություն էր հայտնում միակողմակի գնահատականների պատճառով և փորձում էր եվրոպական միության գործընկերներին ավելի կոնստրուկտիվ քննարկումների դաշտ հրավիրել, ինչը չէր ստացվում վերջին շրջանում: Դրանից ոչինչ չի կորցնի Ռուսաստանը: Ոչինչ չի կորցնի նաև Եվրոպական միությունը՝ որպես միասնական կառույց: Բայց ԵԽԽՎ-ն՝ որպես լայն քննարկումների հարթակ, որպես խորհրդարանական դիվանագիտություն իրականացնող մեծ գործիք՝ փաստացի կկորցնի մեծ ռեսուրս: ԵԽԽՎ-ն, փաստորեն, կկորցնի միջազգային քաղաքական գործընթացների վրա ազդելու հնարավորություններ: Հետևաբար՝ ավելի շատ անհանգստանալու առիթ ունի հենց ԵԽԽՎ-ն, ոչ թե Ռուսաստանը:
-Ռուսաստանը սպառնում է իր նկատմամբ պատժամիջոցները չհանելու դեպքում դուրս գալ Եվրոպայի խորհրդի կազմից: Ի՞նչ կասեք այս մասին: Ի՞նչ զարգացումներ կարելի է սպասել մոտ ապագայում:
-Կարծում եմ, որ Ռուսաստանն ամեն դեպքում կփորձի խուսափել ծայրահեղ քայլերից: Բայց չեմ բացառում, որ այդպիսի զարգացումներ էլ կարող են լինել: Վերջին հաշվով՝ եթե Ռուսաստանը պիտի լինի ԵԽԽՎ անդամ, ու եթե չպիտի կարողանա իր համար բարենպաստ որոշումներ ստանալ, ուրեմն անիմաստ է այդ կառույցի հետ համագործակցության շարունակությունը: Այնպես որ՝ հնարավոր է՝ դուրս գան, հնարավոր է՝ խստացնեն իրենց պահանջները: Ռուսաստանն այժմ ավելի մեծ խնդիրներ ունի: Այս երկիրը տուժում է ոչ թե ԵԽԽՎ-ի կազմում լինել-չլինելու փաստից, այլ այն հանգամանքից, որ արևմուտքի հետ այժմ բավական լուրջ խնդիրներ կան: Ռուսաստանում առկա խնդիրներն, առաջին հերթին, վերաբերում են տնտեսական զարգացմանը, հետևաբար, պաշտոնական Մոսկվան ավելի մեծ խնդիրներ ունի:
Հարցազրույցը վարեց Հասմիկ Բալեյանը