Ներկայացված է «ԱՍ» մրցանակաբաշխության «Տարվա լավագույն մարզպետ» կատեգորիայում
Քվեարկել այստեղ
Ինչպե՞ս եք գնահատում 2013թ.-ին ՀՀ ներքին և արտաքին տնտեսական զարգացումները, ի՞նչ տնտեսական ձեռքբերումներ և կորուստներ ունեցավ Ձեր ղեկավարած մարզը:
Արարատի մարզը ՀՀ արդյունաբերական զարգացած մարզերից է: Արարատի մարզի արդյունաբերական ձեռնարկությունների արտադրանքը կազմում է ՀՀ արդյունաբերության ծավալի 10,1 %-ը, նախորդ տարվա 8,9 %-ի դիմաց /ըստ 2013թ. 9 ամիսների տվյալների/: Մարզում, նախորդ տարվա 82-ի փոխարեն, գործում են 85 արտադրական ձեռնարկություններ , որոնցից առավել խոշորները 10-ն են, իսկ մնացածը հանդիսանում են փոքր և միջին արտադրական ձեռնարկություններ:
Խոշոր արտադրական ձեռնարկություններից մարզի տնտեսության մեջ էական կշիռ ունեն Արարատցեմենտ, <<Վեդի-Ալկո>>, <<Մասիս-Տոբակո>>, <<Մասիս –տոբակ ինտերնեյշնլ>>, <<Արտաշատի վինկոն>>, Ավշարի գինու, Պռոշյանի կոնյակի գործարանի մասնաճյուղը, Արտաշատի պահածոների, կղմինդրի, Արարատի, Մասիսի պահածոների գործարանները, Արարատի ոսկու կորզման ֆաբրիկան:
Արարատի մարզում է արտադրվում Հայաստանում արտադրվող գինու, կոնյակի, օղու արտադրանքի գերակշիռ մասը: Տարեկան արտադրվում է ավելի քան 105 հազ. դկլ օղի և օղու-լիկյորի արտադրանք, հազ. լիտր, 131 հազ. դկլ կոնյակ, 73.2 հազ. դկլ գինի: Մարզի գինու-կոնյակի, պահածոների գործարանների թողարկած արտադրանքը իր բարձր որակի շնորհիվ մեծ ճանաչում է ձեռք բերել միջազգային ասպարեզում: Մարզում զարգանում է նաև փոքր և միջին ձեռնարկատիրությունը, դրանք հիմնականում սննդի, շինանյութերի, անտառային, քիմիական, մշակութակենցաղային նշանակության և թեթև արդյունաբերության ապրանքների արտադրական ձեռնարկություններ են:
2013թ. 9 ամիսների ընթացքում մարզի արտադրական ձեռնարկությունների, փոքր ձեռնարկատիրական սուբյեկտների կողմից թողարկվել է 88 մլրդ 100.1 մլն դրամի պատրաստի արտադրանք, նախորդ տարվա 70 մլրդ 457.6 մլն դրամի դիմաց 125%/: Արտադրանքի իրացման ծավալը կազմել է 97 մլրդ 703.9 մլն դրամ, նախորդ տարվա 78 մլրդ 745.5 մլն դրամի դիմաց /124%/:
Մարզում 2013թ. 9 ամիսների ընթացքում սպառողական շուկայում մանրածախ ապրանքաշրջանառության ծավալը ընթացիկ գներով կազմել է 22 մլրդ 582.9 մլն դրամ, նախորդ տարվա նույն ժամանակահատվածի 17 մլրդ 586.4 մլն դրամի դիմաց և իրականացվել է 1155 առևտրային կազմակերպությունների միջոցով: Մարզի մանրածախ ապրանքաշրջանառության ծավալի 11 մլրդ 511.4 մլն դրամը, կամ 50.9 %- ը ձևավորվել է խանութների, 3.7 %-ը` կրպակների, 2.7 %-ը` հանրային սննդի ձեռնարկությունների, 19.6 %-ը` գյուղատնտեսական շուկաների և 23.1%-ը` սպառողական ապրանքների շուկաների միջոցով:
Արարատի մարզի տնտեսության հիմքը գյուղատնտեսությունն է և այն հիմնականում մասնագիտացած է խաղողագործության,պտղաբուծության, բանջարաբուծության մեջ:
Մարզի գյուղատնտեսության տեսակարար կշիռը հանրապետության ընդհանուր ծավալում կազմել է 16.6 %, նախորդ տարվա 15.2 %-ի դիմաց: Գյուղատնտեսության ոլորտում աշխատում են շուրջ 60 000 մարդ:
Մարզում այս տարի արտադրվել է 104 500 տոննա խաղող, 306 030 տոննա բանջարեղեն, 65 400 տոննա բոստանային մթերքներ, 91 800 տոննա մրգեր և հատապտուղներ,23 200 տոննա հացահատիկային մթերքներ,24 150 տոննա կարտոֆիլ, պահեստավորվել է 200 750 տոննա խոտ:
2013 թվականին մարզում բերքատու պտղի և հատապտղի տարածությունը նախորդ տարիների համեմատ աճել է 97,4 հա-ով, խաղողի այգիների տարածքները նախորդ տարվանից ավել է 33,2 հա-ով, ընդհանուր ցանքը նախորդ տարվա համեմատ աճել է 366 հա-ով, հացահատիկային մշակաբույսերի ցանքատարածությունները աճել են շուրջ 11 հա-ով: 2013թ. ընթացքում մարզի մշակովի տարածքները ավելացել են 496,6 հա-ով :
Այս տարի արձանագրվել է բանջարեղենի, խաղողի, պտուղ և հատապտղի բերքի աճ:
Ձեր ղեկավարած մարզում անցողիկ տարում արտագաղթի տեմպն աճել է, թե նվազել, եթե աճել է, ապա ըստ Ձեզ ինչո՞վ է դա պայմանավորված:
Արարատի մարզից մեկնողները հիմնականում ժամանակավոր արտագնա աշխատանք փնտրելու նպատակով են մեկնում:
Ձեր մարզում փոփոխության ենթարկվե՞լ է բնակչության կենսամակարդակը, քանի՞ նոր աշխատատեղ է ավելացել 2013թ.-ին Ձեր մարզում:
2013թ ընթացքում մարզի տնտեսության զարգացման վրա էական նշանակություն են ունեցել խոշոր մասնավոր ներդրումները մարզի մի շարք ձեռնարկություններում՝ <<Մանանա գրեյն>> քարի վերամշակման և գյուղմթերքի վերամշակման մի շարք գործարաններում ձեռնարկությունների արտադրական հզորությունների ավելացման նպատակով իրականացվել է տեխնոլոգիական նոր հոսքագծերի ներդրման աշխատանքներ՝ Արարատի կոնյակի գործարանում, Այգեստանի, Քաղցրաշենի և Ավշարի գինու/կոնյակի գործարաններում:
2010-ից Արտաշատ քաղաքում մասնավոր ներդրումներով կառուցվել է զովացուցիչ ըմպելիքների և ջրերի գործարանը` 35 մլն ԱՄՆ դոլար արժողությամբ,իսկ 2013թ. ընթացքում տեղադրվել են 5 մլն ԱՄՆ դոլար արժողությամբ ժամանակակից սարքավորումներ: Գործարանը իր արտադրանքը կթողարկի 2014թ.:
Արարատի ոսկու կորզման ֆաբրիկայում <<ԳՊՄ-ԳՈԼԴ>> ընկերության կողմից այս տարի կառուցվել է նոր հոսքագիծ՝ իրականացվել է շուրջ 12 մլն դոլարի աշխատանք:
Մարզի ազգաբնակչության կենսամակարդակի բարելավմանն ու տնտեսական զարգացմանը առաձնակի առաջընթաց է հաղորդել ՀՀ կառավարության պահուստային ֆոնդի միջոցներով 2013թ. ընթացքում իրականացվող չորրորդ հրատապ ծրագիրը, որի իրականացման ընթացքում մարզում ստեղծվել են նոր աշխատատեղեր:
Այս տարի Արտաշատ քաղաքում կառուցվում է մեծածավալ առևտրի կենտրոն, որի կառուցման աշխատանքներին մասնակցում է ավելի քան 80 մարդ:
2013թ. ընթացքում մարզում ստեղծվել են 4 փոքր ձեռնարկություններ և 32 առևտրային կազմակերպություններ, որոնց շնորհիվ ստեղծվել է ևս 110 նոր աշխատատեղեր: Մարզում գործող ձեռնարկությունների կարողությունների ընդլայնման, նոր ձեռնարկությունների ստեղծման արդյունքում 2013թ. ընթացքում ստեղծվել են շուրջ 670 նոր աշխատատեղեր:
Ի՞նչ կմաղթեք գալիք տարում Հայաստանին և հայությանը:
Կմաղթեմ, որ 2014 թվականը նվաճումների և առաջխաղացման տարի լինի ինչպես մեր պետության, այնպես էլ համայն հայության համար: Խաղաղությունը, կայունությունը և զարգացումը թող ուղեկից լինեն մեր երկրին, իսկ ջերմությունը, երջանկությունը և հաջողությունը` մեզ բոլորիս: Անկոտրում հավատով սեփական ուժերին, համախմբված և վստահ շարժվենք ընդառաջ գալիք տարուն, լինենք հաստատակամ և ուժեղ մեր նպատակների ու գործերի մեջ: