Առողջապահություն 

Նպատակն արյան հիվանդությունների վաղ հայտնաբերումը և թիրախային բուժումն է

analitik.am

ՀՀ ԱՆ Պրոֆ. Ռ.Յոլյանի անվան արյունաբանական կենտրոնի տնօրեն Սմբատ Դաղբաշյանը ու Բժշկական գենետիկայի և առողջության առաջնային պահպանման կենտրոնի հիմնադիր տնօրեն Թամարա Սարգսյանն ստորագրել են համագործակցության հուշագիր:

«Արյան շատ հիվանդությունների հիմքը գենետիկ տարբեր մուտացիաներն են։ Հետևաբար այս համագործակցությամբ ախտորոշման և բուժման նոր մեթոդների ներդրման համար ստեղծում ենք ավելի նպաստավոր պայմաններ»,-ասել է ՀՀ ԱՆ գլխավոր արյունաբան Սմբատ Դաղբաշյանը։

Այսօր, երբ բժշկության մի շարք բնագավառներում, այդ թվում` արյունաբանության ոլորտում առաջնային նշանակություն են ստացել մոլեկուլյար գենետիկ մակարդակով տեղի ունեցող շեղումների  բացահայտումը և դրանով պայամանավորված բուժման ընտրությունը, գենետիկայի կենտրոնի մասնագետների բազմամյա փորձը և  համագործակցության անհրաժեշտությունը դառնում են առավել արդիական: Մասնավորապես՝ հեմոֆիլիայի, թալասեմիայի, լիմֆոմաների հիմքում ընկած գենետիկ շեղումների հայտնաբերումը բուժման նոր մոտեցումների կիրառության, հիվանդության բուժման նոր հնարավորություններ է ստեղծում:

«Գենետիկական ախտորոշումը տվյալ հիվանդությունների համար որոշիչ է: Հայտնաբերելով գենետիկական փոփոխությունները՝ կարելի է նշանակել թիրախային, ճշգրիտ բուժում»,-ասել է ՀՀ ԱՆ գլխավոր գենետիկ Թամարա Սարգսյանը` հավելելով, որ Բժշկական գենետիկայի և առողջության առաջնային պահպանման կենտրոնում իրականացվող  հետազոտությունների ցանկը բավականին մեծ է։

Հուշագրի շրջանակում երկու կենտրոնն անհրաժեշտության դեպքում կփոխանակեն բժշկագիտության ոլորտում առկա մասնագիտական տեղեկատվությունը,  լաբորատոր  սարքավորումները, կիրականացնեն համատեղ դրամաշնորհային ծրագրեր, գիտագործնական սեմինարներ և գիտական աշխատանքներ:

Հուշագրի ստորագրումով կենտրոնների ներուժը կհամախմբվի  հիվանդությունների ախտորոշման կատարելագործման, հնարավոր նոր մեթոդների ներդրման, ինչպես նաև մոլեկուլյար գենետիկայի ուղղությունը Հայաստանում ամուր հիմքերի վրա դնելու գործում:

Նույն շարքից