Դոնալդ Թրամփի` «Ամերիկան առաջին հերթին» քաղաքականությունը սպառնալիքի տեսքով կախվեց Դավոսում ընթացող միջազգային տնտեսական ֆորումի մթնոլորտում, երբ եվրոպական լիդերներն անհանգստացած խոսում էին միջազգային առևտրային համակարգին և գլոբալիզացիային սպառնացող խնդիրների մասին: Այս մասին գրում է The Wall Street Journal-ը:
Ֆրանսիայի նախագահ Էմանուել Մակրոնը մտահոգություն հայտնեց, որ գլոբալիզացիան լուրջ ճգնաժամ է ապրում, որի կարգավորման համար պետք է միջազգային հարթակում ջանքեր գործադրվեն:
Գերմանիայի կանցլեր Անգելա Մերկելն էլ հայտարարեց, որ պետք է հարցը ոչ թե միակողմանի, այլ բազմակողմանի լուծում ստանա, ուստի բացի գլոբալ հետաքրքրություններից, պետք է հաշվի առնել նաև ազգային շահերը:
Բնական է, որ Եվրոպան դժգոհություն ունի ամերիկյան կառավարությունից մի շարք պատճառներով՝ արևային մարտկոցների և լվացքի մեքենաների մասով մաքսատուրքերի ներդրման, ինչպես նաև միջազգային առևտրային և կլիմայական համաձայնագրերից դուրս գալու հետ կապված:
Եվրոպական լիդերները նաև փորձում են հաղթահարել Թրամփի հարկային բարեփոխումների, որոնք խթանում են որոշ կազմակերպություններին ակտիվները վերադարձնել ԱՄՆ, արդյունքում առաջացած խնդիրները:
Այս հարցերն իր ելույթի ենթատեքստում ունենալով Մակրոնը խոսեց նաև այն մասին, որ եթե ինքն այս գլոբալիզացիայի համար նոր մոտեցում չառաջարկի, ապա հինգ, տաս, տասնհինգ տարի անց ազգայնականները կհաղթեն և կառաջարկեն դուրս գալ այս համակարգից, ինչը վնաս կտա յուրաքանչյուր երկրին:
