Ներկայացվել է «Հատուկ պետական պաշտպանության ենթակա անձանց անվտանգության ապահովման մասին» ՀՀ օրենքում փոփոխություններ և լրացումներ կատարելու մասին օրենքի նախագիծը: Դրա համաձայն պետական պահպանություն տրամադրվելու է՝
1) Հանրապետության նախագահին.
2) վարչապետին.
3) Ազգային ժողովի նախագահին.
4) նախատեսված դեպքերում՝ վարչապետի թեկնածուին։
Հանրապետության նախագահը, վարչապետը և Ազգային ժողովի նախագահը՝ իրենց պաշտոնավարման ժամանակահատվածում, իսկ վարչապետի թեկնածուն՝ մինչև վարչապետ նշանակման հարցի լուծումը, իրավասու չեն հրաժարվելու պետական պահպանությունից:
Ըստ օրենքի նախագծի պետական պահպանության ծառայությունը այսուհետ ենթակա է ՀՀ վարչապետին:
Վարչապետի պետական պահպանությունը
Վարչապետին, նրա նշանակվելուց հետո, տրամադրվում է պետական պահպանություն՝ նրա մշտական և ժամանակավոր գտնվելու վայրերում ։
Պետական պահպանություն տրամադրվում է նաև վարչապետի՝
1.Սահմանադրության 149-րդ հոդվածի 1-ին մասին համապատասխան խորհրդարանական մեծամասնության ներկայացրած թեկնածուին՝ իր թեկնածությունը Հանրապետության նախագահին ներկայացնելու պահից,
2.Սահմանադրության 149-րդ հոդվածի 2-րդ կամ 3-րդ մասին համապատասխան Ազգային ժողովի կողմից ընտրված թեկնածուին՝ վարչապետ ընտրելու որոշումն ընդունվելու պահից:
3.Վարչապետի պաշտոնավարման ժամանակահատվածում պետական պահպանություն տրամադրվում է նաև նրա հետ համատեղ բնակվող, ինչպես նաև նրան ուղեկցող ընտանիքի անդամներին:
4.Պաշտոնաթող վարչապետներին տրամադրվում է անձնական ցմահ պետական պահպանություն, բացառությամբ օրենքով նախատեսված դեպքերի: Պաշտոնաթող վարչապետները կարող են ժամանակավորապես կամ ընդմիշտ հրաժարվել պետական պահպանությունից` այդ մասին գրավոր իրազեկելով լիազոր մարմնի ղեկավարին։
Օրենքի նախագծում «Հայաստանի Հանրապետության պետական պահպանության ծառայությունը վերանվանվում է լիազոր մարմին: Այդ մարմնում պաշտոնների խումբը դասակարգվում է հետևյալ կերպ.
Լիազոր մարմնի ծառայողների պաշտոնների խմբերը
1) լիազոր մարմնի ծառայողների բարձրագույն պաշտոններ`
ա. Լիազոր մարմնի ղեկավար,
բ. Լիազոր մարմնի ղեկավարի առաջին տեղակալ.
2) լիազոր մարմնի ծառայողների գլխավոր պաշտոններ`
Լիազոր մարմնի ղեկավարի տեղակալներ.
Ինքնուրույն կառուցվածքային ստորաբաժանումների պետեր և նրանց տեղակալներ,
ծառայողների ավագ պաշտոններ` ոչ ինքնուրույն ստորաբաժանումների պետեր և նրանց տեղակալներ,
ծառայողների միջին պաշտոններ
ծառայողների կրտսեր պաշտոններ` ենթասպաներով համալրվող պաշտոններ:
Լիազոր մարմնի ծառայողների պաշտոնների գլխավոր, ավագ, միջին և կրտսեր խմբերը կարող են բաժանվել ենթախմբերի:
Լիազոր մարմնի ծառայողների զինվորական կոչումները
Լիազոր մարմնի ծառայողներին, որպես զինծառայողների, շնորհվում են զինվորական կոչումներ: Լիազոր մարմնում սահմանվում են սպաների և ենթասպաների հետևյալ կազմերն ու կոչումները.
Ծառայողների կազմերը | Կոչումները |
Ենթասպայական | ենթասպա, ավագ ենթասպա |
Սպայական | |
կրտսեր սպաներ | լեյտենանտ ավագ լեյտենանտ կապիտան |
ավագ սպաներ | մայոր փոխգնդապետ գնդապետ |
բարձրագույն սպաներ | գեներալ-մայոր գեներալ-լեյտենանտ |
Լիազոր մարմնի ծառայողների բարձրագույն սպայական կոչումները շնորհելու է Հանրապետության նախագահը՝ վարչապետի առաջարկությամբ:
Լիազոր մարմնի ծառայողների ավագ և կրտսեր սպայական, ինչպես նաև ենթասպայական կոչումները շնորհելու է լիազոր մարմնի ղեկավարը:
Լիազոր մարմնում ծառայության անցնելու համար ներկայացված են հետևյալ պահանջները՝
ՀՀ մինչև 30 տարեկան (բացառությամբ տեղափոխվածների) այն չափահաս քաղաքացին, ով անցել է պարտադիր զինվորական ծառայություն (բացառությամբ իգական սեռի քաղաքացիների, բարձրագույն ուսումնական հաստատություններ ավարտած այն անձանց, ովքեր ուսման ընթացքում անցել են զինվորական պատրաստություն և հանձնել սահմանված քննությունները, ինչպես նաև «Զինվորական ծառայության և զինծառայողի կարգավիճակի մասին» Հայաստանի Հանրապետության օրենքի 21-րդ հոդվածի 1-ին մասի 2-րդ և 4-րդ կետերում, 24-րդ հոդվածում նշված և պարտադիր զինվորական ծառայությունից ազատված կամ պարտադիր զինվորական ծառայության զորակոչից տարկետում ստացած և պահեստազորում գրանցված անձանց), տիրապետում է հայերենին, իր գործնական, անձնական, բարոյական հատկանիշներով, կրթությամբ, առողջական վիճակով և ֆիզիկական պատրաստականությամբ ունակ է կատարելու լիազոր մարմնի ծառայողի պարտականությունները` անկախ ազգությունից, ռասայից, սեռից, սոցիալական ծագումից, գույքային կամ այլ դրությունից:
Լիազոր մարմնի առանձին պաշտոններում ծառայության անցնելու համար լիազոր մարմնի ղեկավարի թույլտվությամբ բացառիկ դեպքերում կարող են ծառայության ընդունվել 30-ից ավելի բարձր տարիք ունեցող քաղաքացիներ:
Լիազոր մարմնի ծառայության անցնելու համար թեկնածուների ընտրության, ուսումնասիրման կարգը, ինչպես նաև նրանց ներկայացվող մասնագիտական, ֆիզիկական պատրաստականության, առողջական վիճակի հետ կապված պահանջները սահմանում է լիազոր մարմնի ղեկավարը:
Լիազոր մարմնում ծառայության չի կարող անցնել այն քաղաքացին, ով`
1) դատական կարգով ճանաչվել է անգործունակ կամ սահմանափակ գործունակ.
2) դատական կարգով զրկվել է քաղաքացիական կամ այլ ծառայությունում պաշտոն զբաղեցնելու իրավունքից.
3) դատապարտվել է հանցագործություն կատարելու համար.
4) չի համապատասխանում սույն հոդվածի 1-ին մասով սահմանված պահանջներին.
5) ում նկատմամբ իրականացվում է քրեական հետապնդում.
6) միաժամանակ հանդիսանում է այլ պետության քաղաքացի:
Ծառայության ժամկետները
Լիազոր մարմնում ծառայության համար սահմանվում են հետևյալ տարիքային սահմանափակումները.
Կոչումը | Ծառայության սահմանային տարիքը |
Ենթասպայական կազմ ենթասպա, ավագ ենթասպա |
50 |
Սպայական կազմ Կրտսեր սպայական կազմ լեյտենանտ, ավագ լեյտենանտ, կապիտան |
50 |
Ավագ սպայական կազմ մայոր, փոխգնդապետ, գնդապետ |
50 55 |
Բարձրագույն սպայական կազմ գեներալ-մայոր, գեներալ-լեյտենանտ |
65 |
Սահմանային տարիքի հասած ծառայողների` լիազոր մարմնում ծառայության ժամկետները տվյալ պաշտոնին նշանակելու իրավասություն ունեցող պաշտոնատար անձը բացառիկ դեպքերում կարող է երկարաձգել մինչև 5 (դասախոսական կազմինը և բժշկական, ինչպես նաև օպերատիվ-հետախուզական գործունեություն իրականացնող ավագ սպայական կազմի ծառայողներինը` մինչև 10) տարի ժամկետով: