Ես, որպես ժամանակին անվտանգության աշխատող՝ հակահաբեկչական, ավելի շատ հակված էի մտածել, որ դա ինչ-որ թունավոր նյութ է: Այդ պահին ես հասկացա, որ նրանց պետք է առանձնացնել բոլորից և նրանցից մեկին ուղղակի հանեցի դուրս: Այս մասին Analitik.am-ի թղթակցի հետ զրույցում ասաց Երևանի ավագանու անդամ Գոռ Վարդանյանը: Ստորև ներկայացնում ենք այսօր Երևանի ավագանու նիստի ժամանակ տեղի ունեցած միջադեպի վերաբերյալ Գոռ Վարդանյանի հետ հարցազրույցն ամբողջությամբ:
Պարոն Վարդանյան, ի վերջո ի՞նչ տեղի ունեցավ այսօր Երևանի ավագանու նիստի ժամանակ, ինչի՞ց ամեն ինչ սկսվեց:
Ես կարող եմ ասել այն, ինչ ես եմ տեսել, որից հետո միջամտել եմ: Այդ պահին ես ինչ-որ բան էի կարդում, երբ տեսա, թե ինչպես իմ դիմացով անցավ ավագանու Երկիր Ծիրանի խմբակցության անդամներից մեկը: Ինձ մի պահ թվաց, որ նա ելույթի ցուցակն է տանում: Սակայն հետո սուր հոտ զգացի, ինչից հետո պտտվեցի դեպի իրենց կողմը և տեսա, որ նրանք դիմակներ են կրում և ձեռնոցներ: Հետո նկատեցի, որ նրանց դիմաց նստած ԵԼՔ խմբակցության անդամները սկսեցին վատանալ, ապա ես նկատեցի, որ ԵԾ-ի երկրորդ ներկայացուցիչն արդեն հասնում է քաղաքապետին: Նա դիմակ ու ձեռնոցներ էր կրում, իսկ ձեռքին սև հեղուկով երկու բանկա կար: Հոտն արդեն ավագանու նիստերի դահլիճում տարածվել էր:
Իսկ ի՞նչ հեղուկ էր բանկաների մեջ, տեղյա՞կ եք:
Այս պահին դեռ չեմ կարող ասել: Դա կպարզվի փորձաքննությունից հետո: Բայց թունավոր նյութի հոտ կար, ինչով պայմանավորված ես այդ պահին վատը մտածեցի: Նա ուզում էր այդ հեղուկը լցնել քաղաքապետի վրա: Ես գոռացի, տղաները միանգամից դուրս եկան, փակեցին նրա ճանապարհը, և հեղուկը թափվեց գետնին: Մյուս կնոջ ձեռքն էլ բանկա կար, դա էլ վերցրեցինք ձեռքից, ինչից հետո քաշքշոց սկսվեց:
Դա նրանց որդեգրած քաղաքականությունն է: Ամեն րոպե փորձում են լրատվամիջոցների ուշադրությունը շեղել դեպի իրենց:
Իսկ ինչի՞ց սկսվեց կոնկրետ ծեծկռտուքը:
Ես տեսա, թե ինչպես ԵԾ անդամ կանանցից մեկն ապտակեց ավագանու անդամներից մեկին, ինչը երևում է նաև տեսագրության մեջ: Խառնաշփոթ էր, և դահլիճում կային մարդիկ, ոքվեր վատանում էին: Ես, որպես ժամանակին անվտանգության աշխատող՝ հակաաբեկչական, ավելի շատ հակված էի մտածել, որ դա ինչ-որ թունավոր նյութ է: Մինչև այս պահն էլ այդպես եմ մտածում, որովհետև բոլորի մոտ գլխապտույտ կար և արցունքներ աչքերին: Այդ պահին ես հասկացա, որ նրանց պետք է առանձնացնել բոլորից և նրանցից մեկին ուղակի հանեցի դուրս: Դա արեցի, որովհետև նա կարող էր օգտագործել սեղանի մոտ դրված մյուս լուծույթները:
Այսինքն, բացի կադրերում երևացող տարաներից, էլի տարաներ կայի՞ն:
Այո, պարզվեց, որ կային: Եթե նա այնտեղ մնար, կարող էր օգտագործել դրանք, դրա համար ես դուրս բերեցի: Դա արել եմ անվտանգության նկատառումներից ելնելով: Պետք է կրկնեմ, որ ավագանու անդամներից շատերի մոտ սրտխառնոց կար:
Պարոն Վարդանյան, այսինքն Դուք ընդամենը ցանկանում էիք Երկիր Ծիրանի խմբակցության անդամին դուրս բերել նիստերի դահլիճից:
Միանշանակ: Առահասարակ նման ժողովների ժամանակ, երբ կոնֆլիկտային իրավիճակ է լինում, պետք է հրահրողներն առանձին-առանձին դուրս հանվեն, իրավիճակը հանդարտվի, որ հասկանաս, թե ինչ է կատարվում:
Տեսեք, Դուք ասում եք, որ ընդամենը ցանկանում էիք նրանց դուրս բերել նիստերի դահլիճից: Բայց ԵԾ անդամները պնդում են, որ ձեր գործողութուններում բռնություն կար: Այս մասով ի՞նչ կասեք:
Նախ պետք է ասեմ, որ հենց իրենց արածն է քրեորեն հետապնդելի: Ես զուտ ինքնապաշտպանական գործունեություն եմ ծավալել: Իմ քայլերը բխել են բոլորի անվտանգությունից, այդ թվում նաև Երկիր Ծիրանի խմբակցության անդամների: Մենք հիմա կարող ենք հանգիստ խոսել, սակայն այդ պահին իրավիճակը շատ լարված էր, և նրանց պետք էր հեռացնել այնտեղից, որպեսզի ամեն ինչ հանդարտվեր: Բացի դրանից, կրկնեմ, որ այնտեղ սուր հոտով ինչ-որ նյութ կար, ու մենք մինչև հիմա չգիտենք, թե դա ինչ նյութ է:
Պարոն Վարդանյան, արդեն հայտնի է, որ Երկիր Ծիրանին հաղորդում է ներկայացրել իրավապահներին՝ առանձին նշելով նաև Ձեր անունը: Դուք անհանգստանո՞ւմ եք:
Ես անհանգստանալու առիթ չունեմ: Ավելին, ես էլ նույն կերպ կարող եմ իրենց մեղադրել, որովհետև մենք էլ ենք տուժած: Փոխանակ մենք բողոքենք, իրե՞նք են բողոքում: Դա կանացի լպիրշ պահվածք էր, որն անընդունելի է: Նրանք ուղղակի օգտագործում են այս փաստն իրենց վրա ուշադրություն կենտրոնացնելու համար: Ես ինչ արել եմ, ճիշտ եմ արել, պնդում եմ՝ իմ քայլերը բխել են ինքնապաշտպանական նկատառումներից: Ես դրանով պաշտպանել եմ բոլոր ներկաներին:
Իսկ, ըստ Ձեզ, ի՞նչ պետք է արվի հետագայում նման միջադեպերից խուսափելու համար:
Կարծում եմ,որ պետք է քրեական գործ հարուցել նրանց նկատմամբ, անպայման: Նրանք այս քայլի համար պետք է պատժվեն: Չի կարելի նման կերպ վարվել Երևանի ավագանու նիստի ժամանակ, չի կարելի նման լուծույթ բերել դահլիճ և փորձել այն լցնել քաղաքապետի վրա: Սա արհամարանք է, արվում է մեր պետության դեմ, մեր ազգի դեմ: Ես էլի եմ ասում, չգիտեմ այնտեղ հայտնված լուծույթի բաղադրությունը, սակայն այնտեղ գտնվողների մոտ մինչև այս պահը կա ստրխառնոց և գլխապտույտ: Եթե սովորական կոյուղու ջուր լիներ, հոտը շատ արագ կանցներ: Ինչո՞ւ եմ պնդում, որ դա սովորական կոյուղաջուր չէր, քանի որ նրանք դիմակներ և ձեռնոցներ էին կրում: Եթե դա վտանգավոր չէր,ինչո՞ւ էին դիմակներով: Ես, եթե չեմ սխալվում, հավաքարարի ձեռքերը դուրս է տվել այնտեղ մաքրելուց հետո:
Երբ նիստը վերսկսվեց, ոստիկանության աշխատակիցներ կային այնտեղ: Հնարավո՞ր է, որ սրանից հետո նիստերը ոստիկանների հսկողության ներքո անցնեն:
Ես ինքս եմ առաջարկել ոստիկանություն կանչել, և այս ամենին օրինական ընթացք տալ: Եթե ամեն ինչին օրինական ընթացք տրվի, մյուս անգամ նման բաներ չեն լինի: Ամեն ինչին էլ չափ կա: Հասկանում ենք ընդդիմադիր ուժ են, սակայն պայքարի ձև կա, պետք չէ անընդունելի բաներ անել:
Պարոն Վարդանյան, իսկ ինչ վիճակում է Մարտին Վարդազարյանը, ով հոսպիտալացվել է:
Պարոն Վարդազարյանն այդ օդից թունավորվեց և նրան տարան հիվանդանոց, հիմա ո՞վ է պատասխան տալու դրա համար: Դեռ չգիտեմ, թե ինչ վիճակում է , պատրաստվում եմ զանգահարել և իմանալ: Միայն Վարդազարյանը չէ, այստեղ էլի մարդիկ կան, ովքեր վատացել են:
Իսկ կոնկրետ Դո՞ւք:
Դե գլխապտույտ կա, մի քիչ էլ սրտառնոց, բայց դե իմ դեպքում մի քիչ այլ է: Կարող եմ ասել, որ դահլիճում ով կար, նույն ախտանշանները նրանց մոտ կա՝ մեկի մոտ մի քիչ շատ, մեկի մոտ՝ մի քիչ քիչ:
Չի կարելի նման բաները քաջալերել: Անընդունել է, որ երեք կին դուրս են գալիս և իրենց լպիրշ պահվածքով անում հակաօրինական քայլեր, սրան պետք է վերջ տրվի: