Analitik.am-ը զրուցեց Երևանի ավագանու ՀՀԿ խմբակցության անդամ Նատալյա Լափաուրիի հետ՝ Երևանի ավագանու նիստի ժամանակ տեղի ունեցած միջադեպի վերաբերյալ:
Տիկին Լափաուրի, Երևանի քաղաքապետարանում տեղի ունեցած միջադեպը շարունակում է մնալ ուշադրության կենտրոնում: Երկիր Ծիրանի կուսակցության անդամները պնդում են, որ տեղի է ունեցել սեռական ոտնձգություն, Դուք այնտեղ եք եղել, ի՞նչ կասեք այս մասով, եղե՞լ է նման բան:
Բնականաբար՝ ոչ, ես նման բան չեմ տեսել: Կարծում եմ, որ բոլոր սահմաններն անցել են արդեն, նման որակավորումներ տալը ֆանտազիայի ժանրից է: Չի կարելի ամեն ինչ վերածել կրկեսի և փորձել նման ձևերով ուշադրություն գրավել: Քաղաքական ակցիան էլ պետք է թույլատրելիի սահմաններում լինի և, իհարկե, իրավաչափ:
Իսկ Դուք, որպես կին ցանկություն ունե՞ք հանդիպել Երկիր Ծիրանի խմբակցության անդամների հետ և հարթել խնդիրը, որպեսզի ամեն ինչ ավելի չխորանա:
Ես, որպես կին, մայր, նաև ավագանու անդամ, բազմիցս եմ փորձել դա անել՝ հանդիպել նրանց հետ: Միայն մեկ օրինակ կնշեմ. Դեկտեմբերին, երբ ԵԾ անդամները բազմազավակ ընտանիքին բերել էին քաղաքապետարան, ես փորձեցի հանդիպել և խոսել նրանց հետ: Հասկանո՞ւմ եք՝ խնդիր կա ադեկվատության հետ: Նրանք չեն ցանկանում լսել, ես դա հասկանում եմ այսպես՝ նրանք ոչ թե որևէ բնակչի խնդիր լուծելու, ՏԻՄ լիազորությունների մասին իմանալու ցանկություն ունեն, այլ կոնֆլիկտ հրահրելու, այսպես ասած, բեմականացված շոուներ ցուցադրելու: Այսինքն՝ այս մարդիկ կամ հոգեկան առողջության հետ խնդիր ունեն կամ էլ այս կերպ փորձում են ուղակի դիվիդենտներ շահել, բայց սա շատ վտանգավոր երևույթ է, և մենք բոլորս՝ անկախ կուսակցական պատկանելությունից չպետք է խրախուսենք նման պահվածքը:
Բնականաբար քաղաքում կան խնդիրներ, և դրանց մասին բարձրաձայնելու և քննարկելու ավելի քաղաքակիրթ ձևեր գոյություն ունեն: Սակայն, նույնիսկ հիմա պատրաստ եմ հանդիպել նրանց, բայց պատրաստ եմ ոչ թե սոլիդարությունից ելնելով, այլ նրա համար, որ նրանց ևս մեկ անգամ ցույց տամ քաղաքականությամբ զբաղվող կնոջ կերպարը: Կին ասելով չպետք է հասկանալ սադրիչ գործողություններ, ոչ կոռեկտ պահվածք, գոռգռոցներ և ոչ ադեկվատ պահվածք, հակառակը՝ հենց կանայք են քաղաքականություն բերում զսպվածություն, հավասարակշռվածություն և չափավորություն: Աշխարհի բոլոր երկրներում է այդպես, նայեք կայացած կին քաղաքական գործիչներին, բիզնես լեդիներին և առհասարակ բոլոր այն կանանց, ովքեր ակտիվ գործունեություն են ծավալում, ոչ մի երկրում դուք չեք տեսնի կանանց նման պահվածք, եթե իհարկե չենք խոսում ինչ-որ անհասկանալի և ոչ ադեկվատ շարժումների ներկայացուցիչների մասին, որոնց անգամ ազատության բարձր աստիճան ունեցող եվրոպական երկրներում չեն ընկալում:
Իսկ առհասարակ ինչպե՞ս եք վերաբերվում ավագանու նիստի ժամանակ կատարվածին, եթե մի կողմ դնենք այն, որ միջադեպի մասնակիցների թվում կանայք կային:
Նախ, նշեմ, որ կին-տղամարդ իրավահավասարության հարցի համար պայքարողներն են հենց շեշտադրում կանանց մասնակցության հարցը: Տեսեք՝ ես ի սկզբանե կարծում եմ, որ կանայք և տղամարդիկ, բնական է, իրավահավասար են, դա փաստ է, մեր հասարակության մեջ չի կարող լինել կնոջ դերի թերագնահատում և երբեք էլ չի եղել, դա փորձում են համոզել հենց այն մարդիկ, ովքեր իբր պայքարում են այդ իրավահավասարության համար: Հիմա հարց, եթե, նրանք ցանկանում են հասնել նրան, որ կնոջ և տղամարդու միջև հավասարություն լինի ոչ թե իրավական, այլ բարոյական հարթակում, ապա ինչո՞ւ են նեղվում, երբ իրենց ոչ հավասարակշռված արարքը զսպվում է տղամարդկանց կողմից: Եթե նրանք ուզում են, որպեսզի իրենց չվերաբերվեն որպես կին, ապա ի՞նչն է խնդիրը, ինչո՞ւ են շահարկում տղամարդ-կին հարաբերությունների հարցը:
Նույն հաջողությամբ կարող էի ես փորձել նրան դուրս բերել դահլիճից և ձեռքս միամիտ, դիպչեր, ասենք նրա կրծքին, այդ դեպքում էլ կասեի՞ն, որ սեռական ոտնձգություն է եղել: Վստահ եմ՝ ոչ, քանի որ այդ մարդկանց խնդիրն ի սկզբանե նման շոու բեմադրելն էր, իսկ հետո այն իրենց ուզած ձևով հանրությանը մատուցելը: Պահվածքը, որ նրանք դրսևորեցին, ահաբեկչութան նման մի բան էր: Ես չեմ ցանկանում նման որակավորումներ տալ, ուղղակի խոսում եմ որպես մարդ, քաղաքացի, ով այնտեղ նստած էր: Երբ հասկանում ես, որ ավագանու անդամն իրեն պահում է ոչ ադեկվատ, նրա գործողությունները վտանգավոր են դառնում, պետք է մնացած գործողությունները նայել այդ տեսանկյունից: Տեսանյութերում նույնիսկ երևում է, որ առաջինն այդ կինն է առաջ նետվում, նա է հարվածում առաջինը: Ինչպե՞ս կարելի է դա հասկանալ:
Բայց Երկիր Ծիրանիի անդամն ասում է, թե ինչից հետո է հարվածել: Նա Ազատության եթերում հայտարարեց, որ իր կրծքերին ձեռք է տվել ՀՀԿ-ական անդամ, դրա համար էլ հարվածել է:
Չի կարելի այդ աստիճան աղավաղել ամեն ինչ, ուղակի ամոթ է: Այո, հրմշտոց կար, խառնված պահ էր, թունավոր նյութին նմանվող հեղուկ էր տարաներով և այս ու այն կողմ թափված: Բոլորի գործողությունները բխել են այդ մթնոլորտից: Նեղվածք էր, բոլորն իրար կպած էին, հիմա թե ում ինչն է ում կպել, դժվար է ասել: Եվ ամենակարևոր պահը՝ հենց իրենք են խախտել ավագանու նիստի բնականոն ընթացքն իրենց ոչ ադեկվատ գործողություններով:
Ինչ վերաբերում է սեռական ոտնձգության մեղադրանքին, ապա ցանկանում եմ ուշադրություն հրավիրել այն փաստի վրա, որ այդ մեղադրանքները հնչեցին ավելի ուշ՝ երեկոյան: Իսկ երբ դահլիճում էին և խոսում էին միջադեպի մասին, սեռական ոտնձգության մասին խոսք չկար: Եթե այդպիսի բան է տեղի ունեցել, ուրեմն հենց այդ պահին պետք է խոսեին այդ մասին: Միանշանակ է, թե ուր են ուզում տանել հարցը:
Նշենք, որ Analitik.am-ը կապ հաստատեց Երկիր Ծիրանի խմբակցության անդամ Մարինա Խաչատրյանի հետ: Տիկին Խաչատրյանը նշեց, որ հեռախոսով հարցազրույց չի ցանկանում տալ, իսկ հանդիպել չի կարող, քանի որ գրաֆիկը խիտ է: Ամեն դեպքում, նա նշեց, որ առաջիկա օրերին մեկնաբանություններ կլինեն:
