«Քանի որ այստեղ կենդանական աշխարհից օրինակներ բերվեցին, կասեմ, որ հաչող շունը չի կծում, ինչպես ասում է ժողովրդական ասացվածքը»,-խորհրդարանում Սահմանադրական դատարանի պաշտոնում Հրայր Թովմասյանի թեկնածության հարցի քննարկման ժամանակ ասաց ԱԺ ՀՀԿ խմբակցության ղեկավար Վահրամ Բաղդասարյանը:
Բաղդասարյանի խոսքերով, Հրայր Թովմասյանն անձնական և բոլոր շահերից վեր գերադասում է օրենքի գերակայությունը. «Երբ մենք երբեմն ցանկանում էինք օրենքի շրջանցում կատարել, Թովմասյանը մոռանում էր իր քաղաքական ուժի պատկանելությունը և հանդես էր գալիս որպես մասնագետ: Այդ իմաստով մեր խիղճը հանգիստ է»:
Բաղդասարյանը շնորհակալություն հայտնեց նաև Գագիկ Հարությունյանին ՍԴ ինստիտուտը կայացնելու համար՝ նշելով, որ վերջինս այսօր ոչ պակաս պատասխանատու աշխատանքի է անցել (Գագիկ Հարությունյանը կգլխավորի Բարձրագույն դատական խորհուրդը):
ՀՀԿ խմբակցության ղեկավարը կարծում է, որ Թովմասյանի պատասխանատվությունը կրկնապատկվում է, քանի որ նա փոխարինելու է Գագիկ Հարությունյանին:
Խոսքի վերջում Բաղդասարյանը կոչ արեց բոլորին կողմ քվեարկել Թովմասյանի թեկնածությանը:
Ավելի վաղ ԱԺ ԵԼՔ խմբակցության ղեկավար Նիկոլ Փաշինյանը հայտարարել էր, որ Հրայր Թովմասյանը գործուղվում է ՍԴ, որովհետև, ընդդիմադիր պատգամավորի խոսքերով, այս ստահոդ պետության պահապան շունն է` բառի քաղաքական իմաստով: