ԵՄ անդամ երկրները շատ հավանական են համարում, որ ռուսաստանցի նախկին լրտես Սերգեյ Սկրիպալի թունավորման ետևում կանգնած է հենց Ռուսաստանը: Այս մասին Բրյուսելում ԵՄ երկրների կառավարությունների ղեկավարների հետ հանդիպումից հետո հայտարարել է Եվրախորհրդի նախագահ Դոնալդ Տուսկը:
Թվիթերյան իր էջում Տուսկը գրել է, որ կատարվածի մասով այլ բացատրություն չկա: Այսպիսով՝ ԵՄ-ն Սկրիպալի գործի մասով իր աջակցությունն է հայտնել Մեծ Բրիտանիայի տեսակետին:
ԵՄ անդամ բոլոր երկրների արտգործնախարարներն իրենց հերթին շատ հավանական են համարել Մոսկվայի մասնակցությունը Սկրիպալի գործին: Բացառություն են կազմել թերևս միայն Հունաստանը և Իտալիան, որոնց այդքան էլ դուր չեն եկել այս մասով ձևակերպումները:
ԵՄ անդամ երկրները նաև համաձայնության են եկել այն հարցում, որ պետք է խորհրդակցության կանչել Մոսկվայում հավատարմագրված իրենց դեսպանին՝ Մարկուս Էդերերին: Այս մասին հայտնել է Նիդերլանդների վարչապետ Մարկ Ռյուտեն:
