Ռուսաստանի Դաշնության արդյունաբերության և առևտրի նախարարությունը մտադիր է սահմանափակումներ մտցնել ԱՄՆ-ից ներմուծվող ապրանքների համար՝ այդ կերպ պատասխանելով ԱՄՆ նախագահ Դոնալդ Թրամփի որոշմանը, որն այսօր արդեն ուժի մեջ է մտել: Խոսքը մասնավորապես վերաբերում է ալյումինի և պողպատի ներկրման համար մաքսատուրքեր սահմանելուն: Այս մասին Ինտերֆաքս գործակալությանը հայտնել է փոխնախարար Վիկտոր Եվտուխովը:
Ռուսաստանցի փոխնախարարը նշել է, որ պատրաստվում են պատասխան քայլերի՝ կարծիք հայտնելով, որ այդ կերպ են վարվելու նաև բոլոր այն պետությունները, որոնց վերաբերում է Թրամփի որոշումը:
Ռուսական կողմը նաև մտադիր է դիմել Առևտրի համաշխարհային կազմակերպություն: Եվտուխովի խոսքերով՝ սա առաջին դեպքն է, որ կազմակերպության անդամ երկիրը նման միջոցառումներ է ձեռնարկում՝ ելնելով բացառապես ազգային շահերից:
