Այսօր՝ մարտի 23-ին, խորհրդարանն արտահերթ նիստի ժամանակ երկրորդ ընթերցմամբ քննարկեց և ամբողջությամբ ընդունեց «Օտարերկրացիների մասին» ՀՀ օրենքում փոփոխություններ կատարելու մասին» օրինագիծը:
Օրինագծի նպատակն է գործող օրենքով օտարերկրացիներին հատուկ կարգավիճակ տրամադրելու ՀՀ նախագահի լիազորությունները վերապահել վարչապետին:
Առաջին ընթերցման ժամանակ ՀՀ փոխոստիկանապետ Վարդան Եղիազարյանը նշել էր, որ փոփոխությունը բխում է ՀՀ նոր սահմանադրության տրամաբանությունից:
Եղիազարյանի խոսքերով՝ վերոնշյալ կարգավիճակի համար ներկայացվող դիմումների քննարկման կարգը սահմանելու լիազորությունը պատկանելու է ՀՀ կառավարությանը:
Օրինագծով միաժամանակ առաջարկվում է վերացնել հատուկ կացության կարգավիճակ տալու կամ մերժելու որոշումը բողոքարկելու արգելքը:
Այսօր նախագիծն ընդունվեց միաձայն (90 կողմ), իսկ առաջին ընթերցման ժամանակ ընդունվել էր 88 կողմ, 8 դեմ հարաբերակցությամբ: