Րոպեներ առաջ Ազգային ժողով ժամանեց ԱԺ ԵԼՔ խմբակցության պատգամավոր Էդմոն Մարուքյանը, ով լրագրողների հետ զրույցում հայտնեց, թե տեղեկություններ ունի, որ բոլոր պատգամավորները խորհրդարանում են, և նիստը կգումարվի:
Ինչ վերաբերում է վարչապետի հարցի քննարկմանը, Մարուքյանն ասաց, որ ինքը դեմ է քվեարկելու:
Դիտարկմանը, թե միգուցե պետք չէ մասնակցել, ընդդիմադիր պատգամավորն ասաց, որ դա Սերժ Սարգսյանի համար ամենալավ տարբերակն է. «Եթե նիստը է գումարվում ու մենք չենք մասնակցում, թույլ ենք տալիս, որ Սերժ Սարգսյանն ընտրվի առանց իրեն ուղղված որևէ խոսքի, որևէ ասելիքի, որը բխում է ՀՀ քաղաքացիների սրտերից»:
Հարցին, թե հնարավոր է արդյո՞ք, որ ցուցարարների թվով պայմանավորված Լուսավոր Հայաստանը փոխի որոշումը և միանա Փաշինյանին, Մարուքյանն ասաց, որ իրենց որոշումը քաղաքացիների թվի հետ կապ չունի, իրենք իրենց որոշումը շատ պարզ, մանրամասն բացատրել են. «Մենք ասել ենք, եթե բռնություն լինի կգանք կմիջամտենք: Այդ որոշում ուժի մեջ է: Տեղեկություններ կան, որ մարդիկ են բերման ենթարկվում, բնականաբար մենք կմիջամտենք նաև դրան: Այն, ինչը պետք է անի ԱԺ պատգամավորը, մենք կանենք»:
Մարուքյանը նաև հայտարարեց, որ չի մտափոխվել ցույցերին չմասնակցելու մասով իր որոշման հարցում՝ հավելելով, որ այն ինչ մեկ ամիս առաջ ասել է Փաշինյանին, հիմա քայլ առ քայլ տեղի է ունենում: