Մայիսի 15-ին պաշտպանության բանակի սպայական ակումբում ՊԲ հրամանատարի ԱՀՏԱ գծով տեղակալ, գեներալ-մայոր Վարդան Բալայանի ղեկավարությամբ անց է կացվել հավաք-խորհրդակցություն, որին մասնակցել են ՊԲ միավորումների և զորամասերի բարոյահոգեբանական ապահովման ոլորտի սպայակազմն ու սերժանտական կառույցների ներկայացուցիչները:
Բանակի հրամանատարի տեղակալը ներկաների ուշադրությունը հրավիրել է բանակում անընդունելի բռնարարքներին, դժբախտ պատահարներին ու անվտանգության կանոնների խախտման արդյունքում տեղի ունեցող դեպքերին՝ նշելով, որ չնայած իրականացվող աշխատանքների շնորհիվ դրական արդյունքներն ակնհայտ են, դեռևս կան անելիքներ:
Զինվորական կոլեկտիվներում տեղ գտնող անցանկալի երևույթներին ու դրանք ծնող պատճառներին անդրադարձել են նաև զորամասերի սերժանտական խորհուրդների նախագահներն ուԱՀՏԱ ոլորտի պատասխանատուները:
Հավաք-խորհրդակցության մասնակիցներին ուղղված եզրափակիչ խոսքում գեներալ-մայոր Վ. Բալայանը առաջադրված խնդիրները սահմանված կարգով կատարելու համար ներկաներին տվել է անհրաժեշտ ցուցումներ ու հանձնարարականներ:
