Օգոստոսի 26-ին ՀՀ ԱԺ նախագահ Գալուստ Սահակյանն ընդունել է Կանադայի Համադաշնության խորհրդարանական պատվիրակությանը, որի կազմում էին պատգամավորներ Բրեդ Բաթը, Լեոն Բենուան, Ռաս Հյուբերտը և «Մեկ ազատ աշխարհ» ՀԿ-ի նախագահ Մաջիդ էլ Շաֆին, ՀԿ անդամներ Սամուել Պլետտը և Հանի Պողոսյանը: Այս մասին տեղեկացնում է ԱԺ լրատվական ծառայությունը:
ՀՀ ԱԺ նախագահ Գալուստ Սահակյանը, ողջունելով հյուրերին Ազգային ժողովում, կարևորել է Հայաստանի և Կանադայի միջև քաղաքական երկխոսությունը և երկկողմ հարաբերությունների հետագա զարգացումը: ՀՀ ԱԺ նախագահի խոսքով՝ երկու երկրներն ունեն համագործակցության բարի ավանդույթներ, և Հայաստանը մեծ նշանակություն է տալիս միջխորհրդարանական կապերի խորացմանը:
Գալուստ Սահակյանը միջխորհրդարանական կապերի զարգացման գործում կարևորել է բարեկամական խմբերի աշխատանքը և նշել, որ ՀՀ Ազգային ժողովում կա Հայաստան-Կանադա բարեկամության պատգամավորական խումբ: Ազգային ժողովի նախագահը բարձր է գնահատել հայ և կանադացի խորհրդարանականների արդյունավետ համագործակցությունը ՄԱԿ-ում, Ֆրանկոֆոնիայի խորհրդարանական վեհաժողովում և այլ հեղինակավոր միջազգային կառույցներում:
Անդրադառնալով Լեռնային Ղարաբաղի հիմնահարցին՝ ՀՀ ԱԺ նախագահ Գալուստ Սահակյանը նշել է, որ Հայաստանը հետամուտ է խնդրի կարգավորմանը միայն խաղաղ ճանապարհով և բարձր է գնահատում Կանադայի հավասարակշռված դիրքորոշումը ԼՂ հակամարտության կարգավորման հարցում: Պարոն Սահակյանը նշեց, որ 2015 թ.-ին լրանում է Հայոց ցեղասպանության հարյուրամյա տարելիցը, և անդրադառնալով մարդկության դեմ հանցագործությունների դատապարտմանը՝ բարձր է գնահատել Կանադայի դերակատարությունը Հայոց ցեղասպանության ճանաչման գործում: ՀՀ ԱԺ նախագահը հյուրերին հրավիրեց մասնակցելու 2015 թ.-ի ապրիլին Երևանում կազմակերպվելիք «Խորհրդարանականներն ընդդեմ ցեղասպանության» խորագրով միջազգային համաժողովին:
Պատվիրակության անդամները շնորհակալություն են հայտնել ընդունելության համար և նշել, որ առավոտյան այցելել են Հայոց ցեղասպանության հուշահամալիր և ծանոթանալով թանգարանի ցուցանմուշներին՝ լիովին զգացել են հայ ժողովրդի ցավը: Նրանք սիրով ընդունել են ՀՀ ԱԺ նախագահի՝ միջազգային համաժողովին մասնակցելու հրավերը և կարծիք հայտնեցին, որ ցեղասպանության ճանաչման հարցը ոչ միայն Թուրքիայի իշխանությունների խնդիրն է, այլև թուրք ժողովրդի:
Հանդիպման մասնակիցները քննարկել են երկկողմ հետաքրքրություն ներկայացնող այլ հարցեր ևս:
