ՀՀ արդարադատության նախարար Հովհաննես Մանուկյանը այսօր լրագրողների հետ ճեպազրույցի ժամանակ ասաց, թե իր տեղեկություններով՝ Թբիլիսիի Սուրբ Էջմիածին հայկական եկեղեցում օրերս տեղի ունեցած միջադեպը կենցաղային վեճի արդյունք էր:
«Ցավում եմ Թբիլիսում տեղի ունեցած միջադեպի համար: Իմ տեղեկություններով՝ դա եղել է կենցաղային վեճ, որը, ցավոք սրտի, վերածվել է մեծ ընդհարման, որը տեղի է ունեցել Սուրբ Էջմիածին եկեղեցու մոտ»,– ասաց նա՝ հավելելով, որ այստեղ կրոնական և ազգային հանդուրժողականության խնդիր կա։
Վերջինիս խոսքով, այնուամենայնիվ, միջեկեղեցական հարաբերությունների, հայ և վրաց ժողովրդի հարաբերությունների ջերմացման, ակտիվացման մշակութային համար գործիքներ պետք է ստեղծել, որովհետև Վրաստանը Հայաստանի համար ռազմավարական նշանակություն ունի։
«Մենք իրավունք չունենք այս ուղղությամբ չանել ամեն ինչ, որպեսզի մեր հարաբերությունները մեր բարեկամ ժողովրդի հետ լինեն ամուր և ավելի խորանան»,– ասաց նա:
Նախարարը նաև նշեց, թե չի կարծում, որ տեղի ունեցածը Վրաստանի իշխանությունների ձեռքի գործն է, թեև ավելացրեց, որ միջեկեղեցական հարաբերությունների խնդիրներ հայ և վրաց եկեղեցիների միջև, այդուհանդերձ, կան:
Հիշեցնենք, որ հուլիսի 19-ին վրացիների մոտ 50 հոգանոց խումբ ներխուժել էր Թբիլիսիի Հավլաբար թաղամասի Սբ Էջմիածին եկեղեցի, ուր ընթանալիս էր եղել պատարագ և սկսել են ծեծի ենթարկել հավաքված հավատացյալ հայերին, մի քանի հարվածներ հասցնելով նաև Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանին, ով փորձել էր հարթել միջադեպը:
