ՀՀ երկրորդ նախագահ Ռոբերտ Քոչարյանի ֆրանսահայ փաստաբան Սևակ Թորոսյանի խոսքերով, իր բազմաթիվ կոլեգաները, Ֆրանսիայի թիվ մեկ պրոֆեսորներն ասում են, որ 300.1-ը որով մեղադրում են Քոչարյանին, անհասկանալի է, այն հիմք չի կարող դառնալ որևէ քրեական գործի և պատժի համար. «Չգիտեմ, թե ինչ են ասելու դատարանները, կամ դրանց հրահանգողները միջազգային կառույցներին:
Օրինակ Էրդողանը, երբ ՄԻԵԴ-ից ծանր որոշում է ստանում Թուրքիայի դեմ, հզոր լինելով, իր գաղափարներն ունենալով, հարուստ երկիր ունենալով, շատ չի ցնցվում:
Կարծես թե Հայաստանում Էրդողանի նկատմամբ նախանձություն կա: Թուրքիայի նման երկրները կարող են կարևորություն չտալ ՄԻԵԴ-ի որոշումներին, Հայաստանում կարծես թե կարծում են, որ կարող են այստեղ էլ կարևորություն չտալ: Բայց հարուստին նախանձելը վտանգավոր է, սրա հետևանքներն ինչ են լինելու, չեմ կարող ասել»:
Սևակ Թորոսյանը կարծում է, որ Նիկոլ Փաշինյանը Քոչարյանի գործով չի փոխի իր միտքը քանի դեռ ժողովուրդն իր հետ է:
Փաստաբանը նաև հայտարարեց, որ Ռոբերտ Քոչարյանի դատավարության խնդիրը Նիկոլ Փաշինյանն է. «Ես տեսնում եմ, որ փոքր դատավարությունները նորմալ անցնում են: Մեկը թող բացատրի Նիկոլ Փաշինյանին, որ վրեժխնդրությունը դատավարության հետ կապ չունի: Այս խնդիրը պետք է լուծել»: