Երեկ ուշ երեկոյան Առողջապահության համաշխարհային կազմակերպության գլխավոր տնօրենը արտակարգ կոմիտեի հանդիպումից հետո հայտարարեց միջազգային նշանակության հանրային առողջապահական արտակարգ իրավիճակը: Այսօր լրագրողների հետ հանդիպմանը հայտարարեց ՀՀ Առողջապահության նախարար Արսեն Թորոսյանը՝ խոսելով Կորոնավիրուսի թեմայի մասին:
Նախարարի խոսքերով, որոշումը պայմանավորված էր Չինաստանից դուրս մարդուց մարդուն վիրուսի փոխանցմամբ, մինչև երեկ նման բան տեղի չէր ունեցել:
Թորոսյանը հիշեցրեց Հայաստանում ՀՀ վարչապետ Նիկոլ Փաշինյանի որոշմամբ ստեղծված միջգերատեսչական հանձնաժողովի մասին՝ հայտնելով, որ այսօր փոխվարչապետ Տիգրան Ավինյանի գլխավորությամբ կայացել է հանձնաժողովի առաջին նիստը. «Նիստի ընթացքում մենք քննարկել ենք ստեղծված իրավիճակը, կատարված քայլերը, նաև անելիքը: Քննարկվել է նաև Չինաստանի քաղաքացիների մուտքի սահմանափակումների հարցը, որի վերաբերյալ առաջիկայում ՀՀ ԱԳՆ-ն հանդես կգա հայտարարությամբ»:
Նիստի ընթացքում քննարկվել են նաև Չինաստանում բնակվող ՀՀ քաղաքացիների հարցը. «Այն բոլոր միջոցառումները, որոնք նախատեսված են Առողջապահության համաշխարհային կազմակերպության միջազգային կանոններով, կատարվում են: Դրա մեջ են մտնում սահմանային վերահսկողությունը, պացիենտների վերջնական ախտորոշումը և վարումը»:
Ինչ վերաբերում է բժշկական ախտորոշիչ թեստերի հետ կապված խնդիրներին, Թորոսյանը նշեց, որ այդ խնդիրներն ունեն բոլորը, քանի որ հիվանդությունը նոր է. «Ախոտորոշիչ թեստը նոր է մշակվում: Մենք արդեն պայմանավորվածություն ունենք չինական արտադրողի հետ և այդ թեստերը շուտով կուղարկվեն Հայաստան: Սակայն ուզում եմ ասել, որ թեստերը կիրառվում են միայն կլինիկական ախտանիշերի ի հայտ գալու դեպքում: Մինչ օրս կլինիկական ախտանիշերով քաղաքացիների մոտ կորոնավիրւսին բնորոշ գծեր ի հայտ չեն եկել: Մենք 99,9 տոկոս հավանականությամբ կարող ենք ասել, որ Հայաստանում Կորոնավիրուսի դեպք չունենք»: