Այսօր՝ խորհրդարանում լրագրողների հետ ճեպազրույցի ժամանակ ՀՀ ԱԺ փոխխոսնակ Ալեն Սիմոնյանը, պատասխանելով դիտարկմանը, որ իրենց քաղաքական ուժը ԿԸՀ-ի նախագահ Տիգրան Մուկուչյանին մեղադրել է բոլոր ժամանակների ընտրությունները կեղծելու մեջ, հայտարարեց, որ լրագրողը խառնում է. «Մեր քաղաքական ուժն այն եզակի քաղաքական ուժն է, որը հայտարարել է՝ ընդդիմությունն ընտրությունների ժամանակ խնդիր է ունեցել, քանի որ չի կարողացել 2000 ընտրատեղամասում ապահովել 2000 ներկայացուցիչ: Ընտրությունների ժամանակ պաշտոնական փաստաթուղթ է համարվում ոչ թե Մուկուչյանի խոսքը, այլ ընտրատեղամասից ստացված արձանագրությունը, որը ստանում է յուրաքանչյուր դիտորդ»:
Սիմոնյանի խոսքերով, այդ արձանագրությունները հավաքելով՝ ունենում ես ընտրությունների տվյալները: ԱԺ փոխխոսնակի պնդմամբ, եթե ամեն ընտրատեղամասից վերցնես արձանագրությունը, ԿԸՀ նախագահի պաշտոնում, եթե նույնիսկ սատանան նստած լինի, որևիցե բան չի կարող փոխվել. «Ի դեպ, նույն ԿԸՀ-ն երկու ընտրություններ է իրականացրել, որը որևիցե միջազգային դիտորդի, ինչպես նաև ընտրություններին մասնակցողի մոտ կասկած չի առաջացրել»:
Սիմոնյանը նաև հայտարարեց, որ նույնիսկ 2017 թվականի ընտրությունների ժամանակ իրենք իրենց գրեթե բոլոր ձայները պահպանել են:
