Ես աջակցել եմ 2018 թվականի իշխանափոխությանը, քանի որ չեմ ցանկացել, որ Հայաստանը գնա արևելաասիական տիպի պետությունների ճանապարհով, երբ մի մարդ հավերժացնում է իր իշխանությունը: Սակայն, երբ հրապարակը սկսեց վանկարկել հեղափոխության առաջնորդի անունը, ես այլևս հրապարակում չեմ եղել: «Սահմանադրական անվտանգություն․ մարտահրավերներ և լուծումներ» թեմայով քննարկման ժամանակ հայտարարեց իրավապաշտպան Ավետիք Իշխանյանը:
«Շատ կարևոր հարց էր այն հույսերի իրականացումը, որոնք կային: Վարչապետն ասել էր, որ չի միջամտելու դատարանների գործերին»,-ասաց Իշխանյանը:
Իրավապաշտպանը նշեց, որ ինքը համաձայն չէ հոդվածի հետ, որ իշխանությունը պատկանում է ժողովրդին. «100 տոկոս ժողովրդի՞ն: Ժողովրդավարությունը ժողովրդի քվեարկության միջոցով, քվեի մեծամասնություն ստացած քաղաքական ուժի իշխանությունն է: Իսկ այն մասը, ովքեր դեմ են, ժողովո՞ւրդ չեն:
Ժամանակակից ժողովրդավարությունը ոչ թե ժողովրդի մեծամասնության քվեն ստացած քաղաքական ուժի իշխանությունն է, այլ իրավական պետությունն է: Առանց իրավական պետության ժամանակակից ժողովրդավարություն չի կարող գոյություն ունենալ»: