Հասարակություն 

Սպաները մեկնել են Գերմանիա՝ սեռական փոքրամասնությունների հետ շփվել սովորելու. «Հրապարակ»

analitik.am

Օրերս բանակային հրամանատարների, ավելի ճիշտ՝ «զամպալիտների»՝ հրամանատարների անձնակազմի հետ աշխատանքի գծով տեղակալների մի խումբ մեկնել է Գերմանիա` վերապատրաստման դասընթացների մասնակցելու: Այս մասին հայտնում է Hraparak.am-ը:

«Դասընթացների առարկան, մեր տեղեկություններով, քիչ է առնչվում ռազմական գործի նրբություններին, մարտական գործողություններին կամ սպայական հմտություններին: Ավելի ճիշտ՝ առնչվում է բանակում տիրող բարքերին և բարոյահոգեբանական մթնոլորտին: Եվրոպացի մասնագետները անձնակազմի հետ աշխատանքի պատասխանատուներին, այլ կերպ ասած` մեր «զամպալիտներին», հանդուրժողականության դասեր են տալիս, սովորեցնում են, թե ինչպես պետք է նրանք շփվեն զինված ուժերում ծառայող սեռական փոքրամասնությունների ներկայացուցիչների հետ, բացատրում են, որ չի կարելի նրանց նվաստացնել, ծեծել, ճնշել, ծաղրել և այլն:

Գերմանական սեմինարի մասին տեղեկությունները փորձեցինք ճշտել պաշտպանության նախարարի մամուլի խոսնակ Արծրուն Հովհաննիսյանից: Նա ասաց, որ չի կարող հրապարակել ո՛չ սեմինարի անունը, ո՛չ էլ մասնակիցների ցանկը: «Դա բաց ինֆորմացիա չէ,- ասաց նա։- Կարող եմ ասել միայն, որ Գերմանիայի հետ ռազմաուսումնական վերապատրաստման ծրագրեր ունենք, ամեն տարի էլ դասընթացներ լինում են: Հրամանատար կազմից միշտ էլ գնում են Գերմանիայում վերապատրաստման»: Մեզ հետաքրքրում է հանդուրժողականության թեմայով սեմինարը, ի՞նչ կարող եք ասել: «Բարեվարքություն, կոռուպցիայի դեմ պայքար, հանդուրժողականություն․ շատ նման թեմաներ կան: Բայց սեմինարի անունը կամ մասնակիցների ցանկը չեմ կարող հրապարակել»,- «ջրեց» խոսնակը»,-ասված է հրապարակման մեջ:

 

Նույն շարքից