«Հրապարակը» գրում է. «Ապրիլի 5-ին սպասվող սահմանադրական հանրաքվեի լոզունգներ, խորհրդանիշ ընտրելու համար իշխող ուժը մրցույթ է հայտարարել։ «Բաց մրցույթ է, մի քանի օր է՝ շրջանառության մեջ է, ցանկացած ոք կարող է մասնակցել, հաղթել։ Դրամական պարգև է սպասվում՝ առաջին, երկրորդ, երրորդ տեղերի համար՝ 3, 2 և 1 միլիոն դրամ», - «Հրապարակ» թերթին ասել է պատգամավոր Հովիկ Աղազարյանը՝ վստահեցնելով, որ պարգևատրումների ֆոնդը ոչ թե պետբյուջեից է, այլ՝ սեփական միջոցներից։
Իշխանության երևակայությունը չի՞ հերիքում, թե՞ պատասխանատվությունն այս հարցում էլ են գցում ժողովրդի վրա։ «Վա՞տ է, որ ժողովրդի հետ ենք քննարկում, ինչո՞ւ եք մեզ տարանջատում ժողովրդից, մենք էլ ժողովրդի մասնիկն ենք», - ասել է նա։
Բայց ավելորդ գումար ունե՞ք, որ ծախսում եք դրա վրա. «Եթե մեր թիմից շահեն, միգուցե այդ գումարն ուղղեն քարոզչության ֆոնդին։ Ես գոնե այդպես կանեի»։
Պատգամավորը վստահեցրել է, որ տասնյակ առաջարկներ են ստացել։ Թե ինչ բովանդակությամբ, չի մանրամասնում, հաղթողներին կընտրեն բոլորը՝ թիմով։ «Կարծեմ՝ 1 շաբաթ ենք մրցույթին տվել, բայց վստահ չգիտեմ», - ասել է նա»:
