«Ճանապարհային երթևեկության հիմնախնդիրները և դրանց լուծման ուղիները» խորագրով Ազգային ժողովում խորհրդարանական լսումների ժամանակ հետևյալ խնդիրներն են ներկայացվել՝
1.Տուգանային միավորների մասով՝
Պետությունն այս հարցով գնացել է խստացման ճանապարհով, սակայն արդյունքները գոհացուցիչ չեն:
Տեսանկարահանող սարքերը ներդրվել են 2012 թվականից:
Վիճակագրական տվյալների համաձայն արձանագրվել է՝
2011թ.՝ 2319 ՃՏՊ, 327 զոհ,
2018թ.՝ 4111 (77%-ով ավել), 343 (4%-ով ավել) զոհ
Պետությունը փորձել է խնդիրը լուծել տուգանային միավորի համակարգ ներդնելով:
Տուգանային միավորներ են սահմանվել նաև մարդու կյանքի անվտանգության հետ չառնչվող որոշ խախտումների համար, օրինակ՝ տրանսպորտային միջոցի հաշվառման համարանիշի առնվազն մեկ նիշը փակելու, ստանդարտին չհամապատասխանող հաշվառման համարանիշով տրանսպորտային միջոցներ վարելու, կանգառի և (կամ) կայանման կանոնները խախտելու համար:
ԱՌԱՋԱՐԿՎՈՒՄ Է՝
- վերանայել տուգանային միավորների կիրառման մեխանիզմը և այն կիրառել միայն մարդու կյանքի անվտանգության հետ կապված դեպքերում.
- պայմանականորեն նշած միջին խախտման դեպքերում (որոնց համար այսօր կիրառվում է տուգանային միավոր) կիրառել տուգանք, սահմանելով, որ որոշակի ժամկետում տուգանքը չվճարվելու դեպքում, կկիրառվի տուգանային միավոր.
- այն վարորդներին, որոնց ապուստի հիմնական աղբյուրը մեքենա վարելն է, շնորհել լրացուցիչ միավորներ:
2.Վարչական իրավախախտումների վերաբերյալ օրենսգրքի (ՎԻՎՕ) վտանգների մասով
ՎԻՎՕ (ընդունվել է 1985թ. ՀԽՍՀ կողմից) 1993թ. սկսել է փոփոխվել: Առ այսօր փոփոխվել կամ լրացվել է 240 անգամ: Այսինքն օրենսդիր մարմինը 240 օրենք է ընդունել միայն օրենսգրքում փոփոխություն կատարելու համար, որից 18 օրենք ընդունվել է յոթերորդ գումարման Ազգային ժողովի կողմից:
ՎԻՎՕ-ի համաձայն՝
- վարչական իրավախախտում (զանցանք) է համարվում ..... ՍՈՑԻԱԼԻՍՏԱԿԱՆ ՍԵՓԱԿԱՆՈՒԹՅԱՆ....դեմ ոտնձգվող հակաիրավական, մեղավոր .... գործողությունը կամ անգործությունը..,
- վարչական տույժը համարվում է պատասխանատվության միջոց և կիրառվում է, նպատակ ունենալով վարչական իրավախախտում կատարած անձին ԴԱՍՏԻԱՐԱԿԵԼ ԽՈՐՀՐԴԱՅԻՆ ՕՐԵՆՔՆԵՐԸ ՊԱՀՊԱՆԵԼՈՒ, ՍՈՑԻԱԼԻՍՏԱԿԱՆ ՀԱՄԱԿԵՑՈՒԹՅԱՆ ԿԱՆՈՆՆԵՐԸ ՀԱՐԳԵԼՈՒ ՈԳՈՎ.
- շատ հոդվածներում ներառված են ԽՍՀՄ օրենսդրությունը պահպանելու, սոցիալիստական իրավագիտակցությամբ ղեկավարվելու պահանջներ:
ԱՌԱՋԱՐԿՎՈՒՄ Է՝
- Վարչական իրավախախտումների վերաբերյալ օրենսգրքից հանել ԽՍՀՄ հետ կապ ունեցող ձևակերպումները:
Փաստաբանների պալատի նախագահ Արա Զոհրաբյան