Թուրքական ուժերը հայտնվել են սիրիական հարվածի տակ, քանի որ գտնվել են սիրիական բանակի դիրքերի վրա հարձակվող գրոհայինների շարքերում: Այս մասին հայտարարել է ՌԴ ՊՆ-ն:
Հայտարարության մեջ նշվում է, որ թուրք զինծառայողները կրակի տակ հայտնվել են Բեհուն բնակավայրի մոտ: Սիրիական բանակի հարվածն ուղղված է եղել «Հայաթ Թահրիր Աշ-Շամ» ահաբեկչական խմբավորման դիրքերին: Նշվում է, որ վերջիններս պատրաստվել են լայն ճակատով հարձակման անցնել:
ՌԴ ՊՆ-ն նաև հայտնում է, որ թուրքական կողմից մշտապես ինֆորմացի է ստացվում Իդլիբում թուրքական ուժերի տեղակայման վայրի մասին: Եվ ահա այդ ստացված տեղեկությունների համաձայն, Բեհունի շրջանում թուրք զինծառայողների մասին որևէ խոսք չի եղել և չէր էլ կարող լինել:
Երբ թուրք զինծառայողների մասին հայտնի է դարձել, Ռուսաստանն օգնել է հասնել կրակի դադարեցմանը և անվտանգ տարհանմանը: ՊՆ-ից նշում են, որ օպերացիային ռուսական օդատիեզերական ուժերի ավիացիան չի մասնակցել:
Այս գիշեր Թուրքիան Իդլիբում հարված է հասցրել սիրիական բանակին: Հարձակումը եղել է սիրիական հարվածի պատասխանը: Ավելի վաղ սիրիական ուժերը, ռուսական աջակցությամբ, Ջեբել-ազ-Զավիայում կրակ էին բացել թուրքական ուժերի վրա, ինչի արդյունքում վերջին տվյալներով կա 33 զոհ: