Ուկրաինայում քաղաքական գործիչների կամ գործարարների համար հիվանդանոցներում չպետք է լինեն VIP պալատներ և այլ հատուկ պայմաններ: Այս մասին հայտարարել է Ուկրաինայի նախագահ Վլադիմիր Զելենսկին՝ քաղաքացիներին ուղղված իր ուղերձում:
«Ուկրաինայի վարչապետին հանձնարարվել է լուծել այսպես կոչված VIP պալատների հարցը և չեղյալ հայտարարել դրա համար պահանջվող բոլոր կանոնակարգերը»,-ասել է պետության ղեկավարը:
Զելենսկին նշել է, որ որևէ քաղաքական գործչի կամ գործարարի համար չի կարող ավելի լավ պայմաններ ստեղծվել պետական հիվանդանոցներում:
«Դուք կհայտնվեք հենց այն հիվանդասենյակներում և այն հիվանդանոցներում, որոնք կառուցել եք այս երկրում 28 տարվա ընթացքում: Միգուցե այդ ժամանակ հասկանաք, թե ինչ է նշանակում հնարավորություն չունենալ բուժվել Շվեյցարիայում կամ Իսրայելում»,-շեշտել է նախագահը:
Զելենսկիի խոսքերով, բացառություններ չեն լինի բարձրաստիճան պաշտոնյաների համար, մասնավորապես, նախագահի, վարչապետի և խորհրդարանի նախագահի համար: