Այսօր առավոտյան ինձ ցույց են տվել, որ Առողջապահության նախարարը երեկվա իմ հարցազրույցներից մեկի վերնագիրը, որն արդեն մանիպուլացված էր, ծաղրի առարկա է դարձրել ֆեյսբուքում: Ես ուզում եմ վերահաստատել այն, ինչ երեկ ասել եմ: Ու մի փոքրիկ «սպրավչկա» հատուկ նախարարի ու մնացած բոլոր նրանց համար, ովքեր չեն հասկանում: Խորհրդարանում հայտարարեց Իմքայլական պատգամավոր Լուսինե Բադալյանը:
«Կորոնավիրուսը տարածվում է օդակաթիլային ճանապարհով, հետևաբար քանի որ դիակը չի հազում, չի շնչում, չի փռշտում, վարակը դիակից անցնում է մակերեսների հետ շփման միջոցով: Հետևաբար դիահերձման կանոնները պետք է համապատասխանեն վարակիչ կամ սուր վարակիչ հիվանդություններից մահացած մարդկանց դիահերձման կանոններին:
Առաջարկում եմ ֆեյսբուքյան չարաճճիությունների ու վերնագրեր մանիպուլացնելու փոխարեն ոլորտին վերաբերող, նախագծին վերաբերող հարցարույցները լսել ամբողջությամբ, հնարավոր է՝ շատ բան սովորեք: Բացի դրանից, պարոն նախարար, եթե ես մի օր որոշեմ ձեր սխալները մանիպուլացնել, կամ դնել ֆեյսբուքյան քվեարկության, հետևանքները Ձեզ հաճույք չեն պարգևի»,-ասաց Բադալյանը:
Պատգամավորն ասաց, որ պետք է քննադատությանը դիմանալ, պատգամավորն իրավունք ունի, կարող է քննադատել ցանկացած միտք, որևէ մեկը չի կարող դրա համար ծաղրել իրեն, կարող է ուղակի քննարկել. «Առողջապահության նախարարն էլ, որ մի քիչ ֆեյսբուքյան չարաճճիությունների փոխարեն գործով զբաղվեր, հնարավոր է մենք չունենայինք այս նախագծերի պարտադիր անհրաժեշտությունը»: