ԱՄՆ-ում տեղի ունեցած զանգվածային ցույցերի և անկարգությունների ընթացքում առնվազն 11 մարդ է մահացել։ Բողոքի ցույցերը սկսվել են սևամորթ Ջորջ Ֆլոյդի կոշտ ձերբակալությունից հետո, ինչի արդյունքում վերջինս մահացել է: Այս մասին հայտնում է Լենտան՝ հղում անելով KTLA-5 հեռուստաալիքին:
Զոհերը եղել են Չիկագոյի, Դեթրոյթի, Օմահայի, Դեվենպորտի, Օքլենդի և Լուիսվիլի բնակիչներ: Նշվում է, որ Օմահայում սպանվել է 22-ամյա աֆրոամերիկացի: Միևնույն ժամանակ, ողջ երկրում վիրավորվել են հարյուրավոր մարդիկ, նրանց ճշգրիտ թիվը հնարավոր չի եղել պարզել:
Ավելի վաղ հաղորդվել է, որ Օքլենդում տեղի ունեցած բողոքի ցույցերի ժամանակ սպանվել է Անվտանգության դաշնային ծառայության մեկ աշխատակից: Նա և իր գործընկերը ստացել են հրազենային վնասվածքներ, վերջինիս կյանքը հաջողվել է փրկել:
Հիշեցնենք, որ ԱՄՆ տասնյակ քաղաքներում շարունակվում են բողոքի ցույցերն ընդդեմ ոստիկանության անօրինական գործողությունների: Որոշ դեպքերում բողոքի ցույցերն ուղեկցվում են անկարգություններով, ոստիկանության հետ բախումներով, կողոպուտներով և ծեծկռտուքներով:
