Այսօր կառավարության մոտ բողոքի ակցիա էին անում Արարատի մարզի Հայանիստ և հարակից համայնքների բնակիչները՝ իշխանություններից պահանջելով լուծել իրենց տրանսպորտի ու ջրի հարցը:
Նրանց խոսքերով, իրենց գյուղեր տրանսպորտը չի աշխատում, իսկ ջրից իրենց երեխաներն առողջական խնդիրներ ունեն, դրա համար պահանջում են փորձաքննություն անցկացնել. «Եթե թույլտվություն լինի, որ կարելի է այս ջուրը խմել ու կարող են խմել բոլոր պատգամավորների երեխաները, իմ երեխան էլ կխմի: Ես չեմ ուզում, որ ջոկողություն լինի»:
«Մենք մի երկրի ժողովուրդ ենք, պետք է համախմբվենք: Չէ որ համախմբված նրան ընտրել ենք: Ես իմ երեխայի ձեռքը բռնած փողոց եմ փակել, գիշեր-ցերեկ քնել ենք փողոցներում, որ ինքը նստի վարչապետ, մեր վիճակը կայունանա, մենք լավ ապրենք, սակայն ես չեմ հասկանում, թե լավը որն է: Էսօր եկել հասել ենք իրա դուռը, չի իջնում մեր հարցերին պատասխանի, մեր ջրի ու տրանսպորտի հարցը հոգա: Մենք չենք վիճում, ուղղակի խնդրում ենք մեր հարցը լուծել, մենք էլ ենք ժողովուրդ»:
Ակցիայի մասնակիցները նույն բովանդակությամբ նամակ ուղարկեցին վարչապետին, ՏԿԵ նախարարին ու Երևանի քաղաքապետին:
