Ես այսօր եկել եմ աշխատելու, շարունակելու եմ իմ գործունեությունը: Լրագրողների հետ զրույցում հայտարարեց ՍԴ դատավոր Ալվինա Գյուլումյանը:
Հարցին՝ մտահոգություն չունի արդյո՞ք, որ իրեն կարող են ուժով հեռացնել, ինչպե՞ս է կարգավորվում հարցը, տիկին Գյուլումյանը նշեց, որ հարցը կարգավորվում է որոշակիորեն սահմանված կարգով. «Որևէ մեկը դեռևս չի արձանագրել, որ իմ լիազորություններն ավարտված են:
Սահմանադրական նորմն ընդունվել է, սակայն գոյություն ունի սահմանադրական դատարանի մասին օրենք, որով կարգավորվում է ՍԴ կազմակերպումն ու գործունեությունը:
Այս պարագայում, օրենքի ուժով մենք դեռևս շարունակում ենք աշխատել:
Դատարանում, երբ որևէ մեկի լիազորությունները դադարել են, այդ մասին դատարանի նիստի արձանագրային, այսպես ասած, որոշում է ընդունվել, որով հաստատվել է տվյալ անձի լիազորությունների դադարեցման փաստը:
Առայժմ այդպիսի փաստաթուղթ չկա: Իսկ հայտարարությունները ոչ իմ, ոչ էլ ձեր աշխատանքից ազատվելու հիմք չեն»:
Բացի դրանից, դատավորի խոսքերով, պետք է լինի նաև իրավական հիմք, որ որոշումը վերաբերում է նաև այս կամ այն դատավորին: