Կեսգիշերից սկսած գրեթե լիարժեք դադար է տեղի ունեցել կրակոցների, չեն կիրառվել հատկապես մեծ տրամաչափի զենքեր, հրետանի: Սակայն մինչ այդ ժամը որոշակի կրակոցներ են եղել: Այս մասին քիչ առաջ մամուլի ասուլիսի ժամանակ ասաց Արծրուն Հովհաննիսյանը՝ նշելով, որ հայկական կողմը նաև երկու ադրբեջանական ԱԹՍ է խոցել, որոնք ընկել են միջդիրքային տարածքում:
Այս պահի դրությամբ անդորրը շարունակվում է. «Արցախյան հատվածում էլ է հանգիստ եղել: Աստված տա այդպես էլ շարունակվի»:
Հովհաննիսյանն իր ցավակցական խոսքն ասաց երեկ ընկած հերոսների ընտանիքներին:
Ինչ վերաբերում է հակառակորդի կորուստներին, Հովհաննիսյանը նշեց, որ արդեն 12 անուն է շրջանառվում, սակայն հայտնի չէ՝ այդ ցուցակը վերջնական է, թե՝ ոչ:
