Ուզում եմ խոսել լրատվական դաշտում այս օրերին տեղի ունեցող իրադարձությունների, միտումների մասին: Չեմ կարող չցիտել մի քանի հրապարակումներ՝ «Նիկոլ Փաշինյան, այդ ի՞նչ ես պայմանավորվել ադրբեջանցի ընկերոջդ հետ, որ տղադ բանակը վերջացնելուց հետո պատերազմ սկսի», կամ «Այդ փամփուշտները հայկական կողմը որտեղի՞ց է ձեռք բերել, ապօրինի ճանապարհով են ձեռք բերվե՞լ բանակի փամփուշտները», կամ «Հակառակորդը ՀՀ-ում խոցեց ռազմավարական նշանակության օբյեկտ» և այլն: Այս մասին Ազգային ժողովում հայտարարեց իմքայլական պատգամավոր Արմեն Խաչատրյանը:
Խաչատրյանի խոսքերով, սա ընդդիմախոսություն չէ, սա դիվերսիա է, պարտիզանական պայքար պետության դեմ. «Սա ուղղված է պետության, ազգային անվտանգության ուժերը ջլատելուն:
Ոչ վաղ անցյալում այդպիսի մարդիկ պրովոկատոր էին որակվում, այսպիսի արարքների համար գնդակահարում էին փողոցներում: Դա անում էին ստիպված, որպեսզի պաշտպանեն երկիրը: Այդ մեթոդները հիմա կիրառելի չեն, սակայն մեր ազգային անվտանգությանը սպառնացող վտանգները նույնն են մնացել:
Ես կոչ եմ անում մեր մեդիամասնագետներին, քաղաքագետներին, իրավագետներին մտածել իրավական կարգավորումների մասին, որպեսզի այդ տեղեկատվությունը, աղբը չմտնի դաշտ»:
Պատգամավորը նշեց, թե միտում է տեսնում, որ մարդիկ ուզում են ինքնադատաստան տեսնել այդպիսի մարդկանց հետ. «Ես կոչ եմ անում նրանց շատ հեռու չգնալ, քանի որ կարող են սամասուդի արժանանալ ու իշխանությունները նույնիսկ չեն կարողանա փրկել նրանց»: