Հասարակություն 

Վարդենուտ և Արագած բնակավայրերի տարածքում կկառուցվի գերժամանակակից զբոսաշրջային ավան

«Ռուցոգ Ինվեստ» ներդրումային հոլդինգի փոխնախագահ Նիկոլայ Կատաևի հետ այսօր քննարկել ենք #Արագածոտնի մարզի #Ապարան խոշորացված համայնքում զբոսաշրջության և գյուղատնտեսության զարգացմանն ուղղված ընկերության ներդրումային առաջարկը: Այդ մասին Ֆեյսբուքի էջում գրել է Արագածոտնի մարզպետ Դավիթ Գևորգյանը:
Հանդիպման ընթացքում ներկայացվեց ներդրումային ծրագրի հայեցակարգային տարբերակը, ըստ որի նախատեսվում է #Վարդենուտ և #Արագած բնակավայրերի տարածքում կառուցել գերժամանակակից զբոսաշրջային ավան, որը ներգնա և արտագնա զբոսաշրջիկներին կառաջարկի ձմեռային և ամառային տուրիզմի տարատեսակ ծառայություններ՝ սկսած դահուկային սպորտի միջազգային ստանդարտներին համապատասխանող սահուղիներից և ճոպանուղուց, վերջացրած ձիարշավարանով և լեռնային հեծանվաուղիներով:
Ծրագրի կարևոր բաղադրիչ է նաև տեղական էկոլոգիապես մաքուր գյուղատնտեսական արտադրանքի խթանումը, որի նպատակով կառուցվելու են փոքր ֆերմերային տներ, որոնք ծառայելու են նաև որպես զբոսաշրջային կացարաններ:
Նախնական գնահատականով ծրագրով նախատեսվում է ավելի քան 200մլն դոլարի ներդրում, 1112 նոր աշխատատեղի ստեղծում: Ակնկալվող զբոսաշրջային հոսքը տարեկան 219.000 այցելու է:
Ծրագրի էական դրական ազդեցությունը կտարածվի 8 բնակավայրի վրա:
Կարևորելով ծրագրի դրական ազդեցությունը մարզի սոցիալ-տնտեսական կյանքի աշխուժացման վրա՝ կարող եմ ասել, որ այս ծրագիրն իրականանալու դեպքում կլուծվի շրջակա համայնքների բնակիչների զբաղվածության հարցը, ինչը կբերի սոցիալական խնդիրների լուծման, ինչպես նաև այն էական ազդեցություն կունենա զբոսաշրջության ոլորտի զարգացման վրա: Պատրաստ եմ ձեռնարկել իմ լիազորություններից բխող հնարավոր բոլոր քայլերը՝ ծրագրի իրականացման ընթացքում առաջացած խնդիրների արագ լուծմանը առավելագույն աջակցելու համար:
«#Ռուցոգ_Ինվեստ» հոլդինգի փոխնախագահ Նիկոլայ Կատաևը նշեց, որ ծրագրի իրականացման տարբեր փուլերում կարևորում է կողմերի համագործակցությունը, կարծիքների փոխանակումը և ակնկալում է մարզպետարանի աջակցությունը:
Հանդիպման ընթացքում քննարկել ենք ծրագրին առնչվող ընթացիկ հարցեր, ձեռք ենք բերել պայմանավորվածություն հետագա աշխատանքներում մարզպետարանի և համայնքապետարանի մասնագետների ներգրավման վերաբերյալ:

  •  
  •  
  •  
  •  
  •  
  •  
  •  
  •  
  •  

Նույն շարքից