Կառավարության մոտ ակցիա են անում քաղաքացիներն, ովքեր ամիսներ առաջ եկել են Հայաստան ու հիմա չեն կարողանում վերադառնալ այն երկրներ, որտեղից եկել են, որպեսզի միանան իրենց ընտանիքներին:
Քիչ առաջ քաղաքացիների հետ հանդիպեց ԱԳ նախարար Զոհրաբ Մնացականյանը: Մնացականյանը նշեց, որ ինքը չգիտի, թե ինչ քաղաքականություն է վարում այս պահին Ռուսաստանը։
Քաղաքացին նշեց, որ Հայաստանի իշխանությունները կարող են համաձայնության գալ ռուսական կողմի հետ, անել այնպես, որպեսզի իրենք կարողանան միանալ իրենց ընտանիքներին:
«Ո՞ւմ հետ համաձայնություն գանք: Ես հստակ տեղյակ չեմ, թե ինչ քաղաքականություն է հիմա վարում Ռուսաստանը:
Հայաստանի քաղաքականությունն այնպիսին է, որ ամեն մարդ, ով ուզում է գալ Հայաստան, կարող է առանց որևէ խոչընդոտի վերադառնալ: Եթե մենք կարող ենք օգտակար լինել վերադառնալու մասով, լինում ենք, ինչպես արել ենք այս ընթացքում: Ինչ վերաբերում է Հայաստանից դուրս գնացողներին, ապա գնացող քաղաքացին պետք է հաշվի առնի, թե ինչ քաղաքականություն է վարում ընդունող երկիրը»:
Մնացականյանը նշեց, որ Երևանն էլ իր սահմանները փակ է պահել այլ երկրների քաղաքացիների համար, սակայն հիմա մեղմացնում է դա:
Նախարարն ասաց, որ Հայաստանը փակ չի պահում, բայց պետք է հաշվի առնել Ռուսաստանի վարած քաղաքականությունը։
