Հաշվի առնելով կենսաթոշակային տարիքի անձանց՝ կորոնավիրուսի տարածման ռիսկային խմբում գտնվելու հանգամանքը՝ սեպտեմբեր 2-ից կենսաթոշակի կանխիկ վճարումն իրականացվելու է բացառապես շահառուների հաշվառման հասցեներում, փոստատարների կողմից, հասցեական առաքման միջոցով:
Ինչպես երևում է, այս որոշումը ոչ բոլորի սրտով է:
Analitik.am-ի հետ զրույցում մի քանի թոշակառու ասացին, որ վերոնշյալ համակարգը դեռ վաղուց է գործում. «Այդ համակարգի պատճառով օրերով հոսանք չեմ ունենում: Թոշակս միշտ ամեն ամսվա 2-3-ին էի ստանում, իսկ հիմա ամսի 10-ին են բերում տուն:
Ես թոշակով ապրող մարդ եմ, ուրիշ եկամուտի աղբյուր չունեմ ու դրա համար էլ դժգոհ եմ այս համակարգից: Փոստում ասում են, թե մեր անվտանգության համար են անում այս ձևով, բայց ինչ անվտանգության մասին է խոսքը: Նույն փոստատարը հարյուրավոր տներ է այցելում և հարյուրավոր մարդկանց հետ է շփվում, նա որքանով է վստահ, որ այդ քաղաքացիներից մեկը վարակված չէ», ասաց Եղվարդի բնակիչ 62-ամյա Ամալյա տատիկը և հավելեց, որ այն, ինչ անում է կառավարությունը, բացառապես «կապիկություն» է:
Նրա խոսքերով, այս որոշման պատճառով դժվարացել է նաև փոստատարների աշխատանքը. «Նրանք ստիպված են իրենց ամբողջ օրը տրամադրել քաղաքացիների տներ այցելելուն, իսկ դա մարդկային չէ: Ես դա համարում եմ անմարդկային արարք, որը իրագործում է կառավարությունը: Ինչպե՞ս կարելի է մարդկանց այդ աստիճան տանջել»:
Մեր մյուս զրուցակիցը՝ 72-ամյա Քնարը, ով բնակվում է Շենգավիթում, ասաց, որ համավարակի կանխարգելման նպատակով ստեղծված համակարգի պատճառով ամեն ամսվա սկզբի 5 օրը միայն հաց է կերել. «Թոշակը բավական ուշ են բերում: Մեղավորությունը փոստինը չէ, նրանք ֆիզիկապես չեն կարող մեկ օրում այդքան թոշակառուի տուն այցելել: Բայց կարելի՞ է նման ձև անել:
Ես ու ամուսինս բնակվում ենք միայնակ: Երեխաներս երկրում չեն, իսկ մենք ապրում ենք միայն թոշակի հույսով: Թոշակը ստանալուն պես գրեթե ամբողջը ծախսվում է դեղերի, կոմունալ վճարների և կողմնակի բաների վրա: Մեր միակ հույսը թոշակն է, դա էլ ուշացնում են:
Ամսվա 5 օրը մենակ հաց ու հոգապահուստում մնացած բաներն ենք ուտում: Բա սենց բա՞ն են անում:
Փոխանակ մեր երկրի իշխանությունը մտածի ծերերին օգնելու մասին, փոխանակ վատ պայմաններում ապրողներին ուտելիքով ապահովի, անիմաստ բաներ է անում:
Ես ժամանակին ընտրել եմ մեր վարչապետին այն հույսով, որ գոնե մի քիչ կբարելավի երկրի վիճակը և ինչ-որ բանով կօգնի անապահով ընտանիքներին, բայց արդեն 2 տարի է ապրում եմ նույն վիճակով, ոչ մի բան չի փոխվել:
Հակառակը՝ ամեն ինչ ավելի վատ է, որովհետև սպասումներս չիրականացավ»:
Քնար տատիկի խոսքերով, ամուսնու ամբողջ թոշակը ծախսվում է միայն դեղորայքի վրա. «Մենք ծեր մարդիկ ենք և շատ գումար չենք էլ ծախսում, բայց պահ է գալիս, երբ սիրտս միս կամ մակարոնից բացի այլ բան է ուզում: Ես այդ չնչին գումարով չեմ կարող նման բան թույլ տալ ինձ:
Շատ բաների մասին կարող եմ ասել, բայց վախենամ դա էլ կտրեն մեզանից: Ուղղակի ուզում եմ, որ այս կառավարությունը վերանա, ուզում եմ երկիրը մաքրվի ստախոսներից և մարդիկ սովորական միս ուտելու համար ամսվա թոշակից կարողանան հանգիստ ծախսել, ոչ թե մտածեն, բա որ միս առնեմ, կարողա 3 օր սոված մնամ»:
Մեր մյուս զրուցակիցը՝ Աշոտ պապիկը, կրկին Եղվարդի բնակիչ է: Նա նշում է, որ փոստ չայցելելով չեն կանխի վարակի տարածումը. «Դա «ապուշ» միտք է: Ի՞նչ է նշանակում դուք մի եկեք փոստ, մեր փոստատարը կգա ձեր տուն և կտա ձեր թոշակը: Դե արի ու մի ասա, բա էդ փոստատարը քանի՞ տուն է այցելում և քանի՞ թոշակառու է այդ նույն գրիչով ստորագրում»:
Աշոտ պապիկը պնդում է, որ սա կառավարության հերթական բեմականացումն է. « Նրանք ձեռք են առնում մեզ: Ծիծաղում են մեզ վրա: Ամսվա կեսն անցնում է նոր թոշակը բերում են: Թե ասա էլ խի՞ եք բերում, մեկ ա արդեն սովորել ենք դատարկ ստամոքսով քնելուն ու լույսերն անջատած ապրելուն:
Թոռներիս հետ դուրս եմ գալիս զբոսանքի, ինձանից մի հատ մառոժնի են ուզում, բայց ես չեմ կարողանում առնել, ինչ ա՝ ասել են փոստ չայցելեք:
Մի օր որոշում եմ գնալ փոստ, հասնում եմ այնտեղ և ինձ ետ են ուղարկում: Իրենց ասում եմ, որ տանս հացը վերջացել է և իմ թոշակն ինձ շատ է պետք, բայց չտվեցին: Իրենք էլ մեղք չունեն, իրենց էլ վերևներից են ստիպում:
Հա, մի բան էլ ասեմ՝ թոշակը տուն բերելուց հետո, բոլոր թոշակառուները կոմունալները վճարելու համար գնում եմ փոստ: Լիքը մարդ է լինում, կուտակումներ են լինում, բա այդ հարցը ինչո՞ւ չեն կարգավորում:
Տրամաբանություն չեմ տեսնում էս «անպիտան» կառավարության արածների մեջ: Մեկ ա թոշակառուները գնալու են իրենց կոմունալները վճարեն փոստում, էլ խի՞ չես թողնում գան թոշակները ստանալու»:
Օֆելի Իսրայելյան
