Իրավապաշտպան Ռուբեն Մելիքյանը ոստիկանության մոտ է՝ օգնելու բերման ենթարկվածներին. «Նրանք բերման են ենթարկվել հայ ժողովրդի արժանապատվությունը պաշտպանելու համար: Ես էլ այդ դիրքորոշումն ունեմ՝ մենք դեմ ենք, որ այն մարդիկ, ովքեր հեղինակն են մեր ժողովրդի նվաստացմանը, թշնամու առաջ ծնկելուն, շարունակեն պաշտոնավարումը»:
Ինչ վերաբերում է փողոց փակելու միջոցով պայքարին, Մելիքյանի խոսքերով, այն 2018 թվականից հետո բողոքի արտահայտման իրավաչափ ձև է համարվում. «Հիմա պատճառաբանում են, որ ռազմական դրություն է գործում, սակայն մեզ համար հասկանալի է, որ այդ դրությունը միայն բողոքի ալիքները ճնշելն է:
Բացարձակապես ոչ իրավաչափ է այս պահին ռազմական դրությունը պահպանելը: Ավելին՝ մենք երեկ իմացանք, որ ռազմական դրության բուն նպատակն անգամ չի կատարվել՝ զորահավաք չի իրականացվել: Սրանք հուսահատ, ռեպրեսիվ փորձեր են այն մարդկանց կողմից, ովքեր իրենց համարում էին ժողովրդավար:
Հայաստանում երբեք այս աստիճան բռնապետական ճնշումեր չեն եղել խոսքի, արտահայտման, հավաքների ազատության առումով»:
Մելիքյանը նշեց, որ ներսում տասնյակ մարդիկ կան՝ շնորհակալություն հայտնելով ՄԻՊ աշխատակիցներին կատարած աշխատանքի համար:
Իրավապաշտպանը հայտնեց, որ 3 ժամը լրանում է ու ձերբակալվածները պետք է ազատ արձակվեն. «Սա խայտառակություն է, քանի որ շատերն ազատությունից զրկվել են ոչ թե վարչական ձերբակալմամբ, այլ քրեական դատավարության շրջանակներում՝ իրենց կողմից մտցված 225.1 հոդվածով՝ Ռազմական դրության ժամանակ հավաք կազմկերպել: Տեղափոխում են Երևան քաղաքի քննչական վարչություն, որպեսզի գործը հանձնեն քննչական մարմիններին՝ նրանք որոշեն ինչպիսի ընթացք են տալիս գործին»:
Հարցին՝ հնարավոր է արդյո՞ք, որ ձերբակալություններ լինեն, Մելիքյանը նշեց, եթե նման բան լինի, հատկապես նրանց նկատմամբ, ովքեր ունեն մինչև 7 տարեկան երեխաներ, դա կլինի ակնհայտ ապօրինի ձերբակալում. «Թեև մյուս դեպքերում ևս ես պնդում եմ, որ սա ակնհայտ ապօրինի ձերբակալություն է»։
