Երբ պատգամավորները, ովքեր ռեյտինգայինով չեն ընտրվել, վայր չդնելով մանդատը, առանձնանում են խմբակցությունից, ես դա համարում եմ շատ ամոթ երևույթ նրանց համար: Ստացվում է այնպես, որ պարտությունը որբ է: Եթե այլ իրավիճակ լիներ պատերազմի դաշտում, նրանք այդպես չէին անի, կգովաբանեին, ավելի շատ հեքիաթներ կպատմեին իրենց արած ու չարածի մասին: Այս մասին լրագրողների հետ զրույցում հայտարարել է իմքայլական պատգամավոր Արմեն Խաչատրյանը:
Խաչատրյանը նշեց, որ նոյեմբերի 9-ից առաջ ստորագրված փաստաթղթին տեղյակ չի եղել, սակայն ստորագրումից ժամեր առաջ կապի մեջ է եղել Արցախի որոշակի շրջանակների հետ, ահազանգեր է ստացել, որ այլևս հնարավոր չէ շարունակել. «Դա եղել են այն մարդիկ, որոնց հետ ամենօրյա կապի մեջ եմ եղել, ովքեր ասում էին, որ լավ կլինի: Նրանք շուտ վհատվողներից չեն: Բայց կոնկրետ այդ օրը, ի զարմանս ինձ, ասացին, որ ժամերի ու րոպեների խնդիր կա: Ես մեսիջները ստացել եմ, սակայն քաղաքական գործընթացներին չեմ մասնակցել, իմ լիազորությունների մեջ չի մտնում: Տեղյակ եմ եղել, որ ծայրահեղ ծանր իրավիճակ է եղել»։