ՀՀ ԱԺ փոխնախագահ Լենա Նազարյանը Sputnik Արմենիայի հետ զրույցի ընթացքում անդրադառնալով մոսկովյան հայտարարությանը նշեց, որ Մոսկվայում շատ կարևոր փաստաթուղթ ստորագրվեց, որի համաձայն տարածաշրջանում պետք է տեղի ունենար տրանսպորտային և տնտեսական ուղիների ապաշրջափակում։
«Եթե այդ ծրագիրը իրագործվեց, մենք կունենանք երկաթուղային կապ Ռուսաստանի և Իրանի հետ։ Բոլորս գիտենք, որ Լարսի ավտոճանապարհը տարբեր տեխնիկական և եղանակային պայմանների պատճառով փակ է, իսկ Ռուսաստանի և Իրանի հետ երկաթուղային կապը արագ և էժան կապի հնարավորություն կսեղծի Հայաստանի համար», - Նազարյանը ևս մեկ անգամ շեշտեց․ «Եթե այս ծրագիրը իրագործվի»։
Նազարյանը կատարեց ևս մեկ դիտարկում՝ կապված մոսկովյան այցի հետ․ «Նոյեմբերի 9-ի հայտարարության մեջ շատ հստակ արձանագրված է, որ Հայաստանը պետք է ապահովի Ադրբեջանի և Նախիջևանի միջև հաղորդակցություն, մոսկովյան պայմանավորվածությունը արդեն շատ հստակ ամրագրում է Ադրբեջանի և Հայաստանի համար հավասար իրավունքներ և պարտավորություններ», - նշեց Նազարյանը
Լրագրողի այն դիտարկմանը, որ Ադրբեջանը մինչ օրս շարունակում է ռազմական հռետորաբանությունը, ինչպե՞ս է Նազարյանը պատկերացնում Ադրբեջանով ճանապարհը դեպի Ռուսաստան Հայաստանի քաղաքացիների համար, Նազարյանը պատասխանեց, որ այդ ամենին հասնելու միակ ճանապարհը խոսակցությունն է։
«Դա գործընթաց է, որով մենք պետք է անցնենք։ Ես լսեցի ընդիմության քննադատությունը․ Տարածաշրջանային և Եվրասիական ինտեգրման հանձնաժողովի նախագահ Միքայել Մելքոմյանը ասում է, որ արյան վրա ապաշրջափակում մեզ պետք չէ, և նշում է, որ արյան վրա չենք կարող ապաշրջափակում կառուցել, և ես ուզում եմ հարցնել՝ ի՞նչ կարող ենք արյան վրա կառուցել, նոր արյո՞ւն, արյան գետե՞ր, ի՞նչ անենք։ Պետք է մտածենք ապագայի մասին, պետք է հասկանանք, թե ինչ անել, որպեսզի տարածաշրջանում խաղաղության երաշխիքներ ստեղծենք»․ - եզրափակեց Նազարյանը։