Նոյեմբերի 10-ին ստորագրված կապիտուլյացիայից անցել են ամիսներ։ Կապիտուլիացիայի կարևոր և առաջնային կետերից մեկը ռազմագերիների վերադարձի կետն է, բայց ցավալին այն է, որ ոչ միայն ռազմագերիների վերադարձը չի իրականացվել, այլ կապիտուլիացիայի ստորագրումից հետո գերիների թիվն ավելացել է։
Նշենք, որ այս պահին հրապարակված չէ ռազմագերիների հստակ թիվ։ Ռազմագերիների վերադարձի թեմայով Analitik.am-ը զրուցեց «Իմ քայլը» խմբակցության պատգամավոր Հովիկ Աղազարյանի հետ։
-Ինչո՞ւ եք շարունակում մնալ պատգամավոր, եթե փաստացի պարտված թիմ եք, անգամ չեք կարողանում լուծել կարևոր հարցերից մեկը՝ ռազմագերիների վերադարձի հարցը։
- Ես ինքս չեմ գտնում, որ մենք պարտվել ենք։ Ես բազմիցս ասել եմ այդ մասին, ասել եմ ոչ թե վերջերս, այլ փաստաթղթի ստորագրումից հետո առաջին իսկ հնարավորության դեպքում։ Ես երբեք համաձայն չեմ եղել պարտության տերմինի հետ, ես համաձայն եմ այն գնահատականի հետ, որ պատերազմական գործողությունների արդյունքում մենք ունեցել ենք շատ ծանր կորուստներ։ Պետք է հետագայում նաև դիվանագիտական ոլորտի աշխատանքների արդյունքում կորուստների չափը մեղմացնենք։
Հիմա վերադառնանք գերիների խնդրին։ Գերիների հարցը դա կարևորագույն հարց է ոչ միայն մեր համար, այլ ընդհանրապես ցանկացած պատերազմների արդյունքում դա շատ դժվար լուծվող և ժամանակ պահանջող հարց է։
Հիմա ի՞նչ իրողությունների մեջ ենք մենք։
Մենք ունենք անհետ կորածների ցուցակ, մենք ունենք գերիների որոշակի ցուցակ, բայց մենք հստակ չենք կարող ասել, թե ցուցակը այդ գերիների ամբողջական է, թե՝ չէ, որովհետև դա կախված է նաև անհետ կորած մեր հայրենակիցների ճակատագրի հետ։
Մենք կհայտնաբերենք իրենց դիերը, թե ոչ , անհետ կորածներից որոշ մարդիկ կհայտնվեն գերիների ցուցակում, թե՝ ոչ։ Այդ ամեն ինչը պետք է ճշտվի։ Եվ հետևաբար, այն պայմանավորվածությունը, որը եղել է 8-րդ կետում՝ գերիների փոխանակում բոլորը բոլորի դիմաց։ Մենք շարժվում ենք այդ պայմանավորվածության շրջանակներում։ Ես խորին համոզմունք ունեմ, որ մոտավորապես մեկ ամսվա ընթացքում այդ խնդիրը հիմնականում կլուծվի։
-Որպես պատգամավոր, ի՞նչ ճնշումներ եք գործադրում վարչապետի վրա գերիների հարցին ավելի արագ լուծում տալու համար։
- Ճնշումներ չենք գործադրում, որովհետև ես չեմ կարծում, որ վարչապետը կամ կառավարության անդամներից որևէ մեկն այլ մոտեցում ունենա այդ հարցի լուծմանը, քան հնարավորինս արագ լուծելու, որովհետև դա իսկապես ծանրագույն հարցերից մեկն է, որ մեծ հասարակական և քաղաքական նշանակություն ունի։
Հետևաբար, ճնշումների կարիք չկա։ Մենք ուղղակի պետք է անենք հնարավորը այդ հարցը լուծելու համար։ Պատգամավորների հնարավորություններն այդ իմաստով սահմանափակ են, որովհետև դրանով զբաղվում են գործադիր իշխանության մեր գործընկերները։
Բայց դե, բոլոր դեպքերում մենք ինչքան էլ, որ կարողանում ենք, շփվում ենք գործադիր իշխանության ներկայացուցիների հետ, ասում ենք մեր նկատառումները, ներկայացնում ենք հասարակության մեջ տիրող անհանգստությունները, որը ևս մի լրացուցիչ խթան է գործադիր իշխանությանն ավելի համապարփակ և ավելի արագ լուծումը տալու համար։
-Հանրության մեծամասնությունը ձեզ և ձեր խմբակցությանն անվանում են դավաճան։ Ի՞նչ եք անում Դուք, որպեսզի ապացուցեք, որ դավաճան չեք։
- Դավաճան տերմինը օգտագործելն այդքան թեթևությամբ տեղին չեմ համարում, որովհետև այն իրողությունները, որոնք այսօր տեղի են ունեցել, դրանց իրավական գնահատականները կտրվեն մի քանի տարի հետո։
Մի տաս տարի հետո կտրվեն իրական գնահատականները, հետևաբար դավաճան տերմինն այսօր օգտագործում են ինչպես մեր հասցեին, այնպես էլ պատերազմի որոշ մասնակիցների հասցեին։
Բայց ես ուզում եմ հույս հայտնեմ, որ այդ արտահայտությունները պայմանավորված են մեր հայրենակիցների էմոցիոնալ ֆոնով։
Կանցնի այս էմոցիոնալ ֆոնը, մենք բոլոր գերիներին կվերադարձնենք հայրենիք և կամաց-կամաց արդեն կսկսենք մտածել, թե որտեղ էինք, ո՞ւր կարող ենք գնալ և այդ ժամանակ արդեն կդատենք։
Իսկ եթե պետք լինի գտնել այնպիսիներին, որոնց հանցավոր անտարբերության և հանցավոր դիտավորության պատճառով մենք ունեցել ենք այս կամ այն ցավալի արդյունքներ, ուրեմն դրանով կզբաղվեն համապատասխան մարմինները։
Մառա Գալոյան
