Այսօր Ազգային ժողովի նիստի մեկնարկին Էդմոն Մարուքյանը, դիմելով ԱԺ նախագահ Արարատ Միրզոյանին ու խոսելով ԱԺ խորհրդի տեղի չունեցած նիստի մասին, հայտարարեց, որ վերջինս ԱԺ նախագահ է, ուստի պարտավոր է նման հարցերում անաչառ լինել. «Եթե որոշում կար, որ խորհրդի նիստը բոյկոտվելու է, ընդդիմության օրակարգով արտահերթ նիստ չի հրավիրվելու, Դուք նվազագույնը պետք է ներկայանայիք, բացեիք նիստն ու իրազեկեիք մեզ՝ որպես ԱԺ նախագահ: Բայց Դուք Ձեր պարտականությունները չեք կատարում:
Կամ Դուք պետք է ներողություն խնդրեք ԱԺ 1/5-ից արհամարհելու համար, կամ պետք է հրաժարական տաք, Դուք ձեր առաքելությունը չեք իրականացնում, արբիտրի դերակատարումը ոտնահարել եք»:
Միրզոյանը Մարուքյանին խորհուրդ տվեց մտածել սեփական պարտականությունների մասին ու զերծ մնալ իր պարտականությունների ներկայացումից. «Առաջարկում եմ անկեղծ ջանք գործադրել իրավիճակի հանգուցալուծման համար: Ես անկեղծ ասեմ՝ չեմ կարծում, որ Ձեր հենց նոր հնչեցրած առաջարկն ուղղված էր հանգուցալուծմանը, կարծում եմ, որ այն մի փոքր բարդություն ավելացնելու փորձ էր ամբողջ խճանկարին»:
«Պարոն Միրզոյան, ես հարցնում եմ՝ Դուք նիստին ինչո՞ւ չեք ներկայացել: Անկեղծ պատասխանեք, թե ինչու եք Ձեր չներկայանալով ավելի սրել իրավիճակը»,-արձագանքեց Մարուքյանը:
ԱԺ նախագահը կրկնեց, որ ինքն իր պարտականությունները կատարում է պատշաճ կարգով, իսկ խորհրդի նիստին չներկայանալն իր իրավունքներից մեկն է. «Ես այդ օրը նիստին չեմ մասնակցել»: