ՀՀ կառավարությունը շուրջ 100 մլն դրամ կտրամադրի արցախյան պատերազմում վիրավորված Արսեն Արթուրի Յավրույանի բուժումը Գերմանիայում կազմակերպելու համար։ Այդ նպատակով պետական բյուջեի պահուստային ֆոնդից գումար հատկացնելու որոշման նախագիծը ներառված է կառավարության վաղվա նիստի օրակարգում։
Նախագծում նշված է, որ ՀՀ առողջապահության նախարարի հրամանով ստեղծված մասնագիտական հանձնաժողովի կողմից 2021 թվականի մարտի 2-ին դրական եզրակացություն է տրվել զինվորական ծառայության պարտականությունները կատարելիս հրազենային վնասվածք ստացած Արսեն Յավրույանի բուժումը Գերմանիայի Դաշնային Հանրապետությունում իրականացնելու հարցին։
Այդ նպատակով առաջարկվում է ՀՀ պաշտպանության նախարարությանը հատկացնել 95 509 100 դրամ, որը ներառում է զինվորի հետազոտման և բուժման, ինչպես նաև կեցության և ճանապարհածախսի համար անհրաժեշտ գումարները։
