Ռուսաստանը ԱՄՆ-ից ծառայություններ կամ օգնություն չի ակնկալում, բայց պահանջում է հարգանք, քանի որ դա անհրաժեշտ է փոխշահավետ հարաբերությունների համար։ Այս մասին ասել է ԱՄՆ-ում Ռուսաստանի դեսպան Անատոլի Անտոնովը:
«ԱՄՆ-ից մեզ հատուկ ծառայություններ կամ օգնություն պետք չէ, բայց մենք հարգանք ենք պահանջում՝ փոխշահավետ հարաբերություններ հաստատելու համար: Մենք ակնկալում ենք, որ մեր շահերը հաշվի կառնվեն»,-ասել է ռուս դիվանագիտական առաքելության ղեկավարը Միդլբերիի ինստիտուտի ուսանողների հետ հանդիպմանը:
Դիվանագետը հավելել է, որ «ներկա խառնաշփոթ գլոբալ պայմաններում» կողմերը պետք է սովորեն համագործակցել իրենց բնակիչների անվտանգության և բարեկեցության համար: Մոսկվան պատրաստ է նման աշխատանքի, հստակեցրել է Անտոնովը:
Միևնույն ժամանակ, դեսպանը շեշտել է, որ Ռուսաստանի Դաշնության համար անընդունելի է ԱՄՆ-ում տարածված տեսակետը, համաձայն որի՝ Ռուսաստանին «անհրաժեշտության դեպքում կարելի է օգտագործել, այնուհետև մի կողմ դնել և նույնիսկ ամեն կերպ վարկաբեկել, եթե օգտակար չլինի Ամերիկայի շահերին»:
