Ուկրաինայի իշխանությունները որոշել են անօրինական ներգաղթյալների հոսքը զսպելու համար մարդասիրական օգնություն ուղարկել փշալարերի տեսքով Լիտվա՝ Բելառուսի հետ սահմանը վերազինելու համար: Այս որոշումն ընդունվել է կառավարության նիստի ժամանակ:
«Շաբաթվա վերջին խոսեցինք Գաբրիելուս Լանդսբերգիսի (Լիտվայի Արտաքին գործերի նախարար) հետ այն աննախադեպ միգրացիոն ճգնաժամի մասին, որի հետ բախվում է Լիտվան։ Այսօր մենք որոշեցինք Լիտվային փշալարեր տրամադրել՝ սահմանն ամրապնդելու համար»,-հանդիպումից հետո Twitter- ում գրել է Ուկրաինայի արտգործնախարար Դմիտրի Կուլեբան։
Հիշեցնենք, որ ավելի վաղ Լիտվան որոշել էր ցանկապատ կառուցել Բելառուսի հետ սահմանին՝ ներգաղթյալներին զսպելու համար: Վարչապետ Ինգրիդա Շիմոնիտեն ասել է, որ իշխանությունները մտադիր են բանակն օգտագործել սահմանին անվտանգությունն ուժեղացնելու համար: Տարեսկզբից Լիտվայում ձերբակալվել է շուրջ մեկուկես հազար անօրինական ներգաղթյալ, հիմնականում ասիական երկրներից, որոնք հանրապետություն են մտել Բելառուսի տարածքից: Սա 17,5 անգամ ավելի է, քան ամբողջ 2020 թվականին: Միգրացիոն ճգնաժամի կապակցությամբ երկրում արտակարգ դրություն է հայտարարվել:
