Գլխավոր Հասարակություն Միջազգային Տնտեսություն Քաղաքականություն 

Հետևանքը կարող է լինել այն, որ իրանցիները կփորձեն խուսափել այդ ճանապարհով Հայաստան ապրանքներ ներմուծելուց. Թունյան (տեսանյութ)

analitik.am

ԱԺ «Քաղաքացիական պայմանագիր» խմբակցության պատգամավոր Բաբկեն Թունյանի կարծիքով՝ Սյունիքում ադրբեջանական ոստիկանական անցակետի տեղադրումը, որտեղ իրանական բեռնատարներից տուրքեր են գանձում, տնտեսության հետ կապելը մի քիչ դժվար է:

«Նախ՝ ես պետք է հասկանամ՝ ինչ է տեղի ունենում, սա այն թեման է, որտեղ որ պետք է բավարար ինֆորմացիա ունենալ, հստակ գնահատականներ տալու համար: Այս պահին ես ավելին չգիտեմ, քան հրապարակված է այն, ինչին ես եմ տեղյակ, այնքանով նաև դուք եք տեղեկացված: Հույս ունեմ, որ իրավիճակը կկարգավորվի, որովհետև սա ամեն դեպքում անհարմարություն է, երբ  Իրանին կապող միակ ճանապարհի հետ նման խնդիրներ կան: Բնականաբար, եթե իրանական բեռնատարները գալիս են Հայաստան և ճանապարհին ստուգման են ենթարկվում, դա խնդիր է, բայց էլի եմ ասում, եկեք սպասենք, տեսնենք հարցն ինչպես կկարգավորվի»,- խորհրդարանում լրագրողների հետ զրույցում ասաց Բաբկեն Թունյանը:

Հարցին՝ շաբաթ օրվանից այս խնդրի մասին բարձրաձայնվել է, չի՞ փորձել պատգամավորը պարզել՝ ինչ է կատարվել, Բաբկեն Թունյանը պատասխանեց, որ եթե իմանա, որ իր հետաքրքրվելն ամեն օր կամ ամեն ժամ արագացնելու է իրավիճակը, բնականաբար, կանի: Սակայն սա այն պահն է, որ ամեն մարդ իր գործով պետք է զբաղվի:

«Կարծում եմ՝ ամենաճիշտ տարբերակը դա է, որ թողնենք ամեն մեկն իր գործով զբաղվի, ինչի համար ինքը պատասխանատու է»,- շեշտեց նա:

Այն, որ ԱԱԾ-ն Որոտանի այդ հատվածն անվանել է ադրբեջանական անունով, Բաբկեն Թունյանը կարծում է, որ ԱԱԾ-ն դրա պատասխանը կունենա:

«Այն, որ Հայաստան եկող իրանական բեռնատարները կարող են ստուգվել ադրբեջանցիների կողմից, դա խնդիր է և ոչ մեկը դա չի կարող հերքել, բայց եկեք սպասենք, տեսնենք՝ իրավիճակը ոնց է հագուցալուծվում: »,- նշեց ԱԺ ՔՊ խմբակցության պատգամավորը՝ հավելելով, որ եթե անգամ գումար չգանձեին ադրբեջանցիները, միայն իրանական բեռնատարները կանգնեցնելու փաստը մտահոգության տեղիք է տալիս:

«Կարող է ոչ մի խնդիր չլինի, կարող է իրավիճակը կարգավորել: Ամեն դեպքում այնպես չէ, որ այս պահին ունենք բլոկավորված ճանապարհ, այդ ապրանքները հասնում են Հայաստան: Քանի որ այդ ճանապարհի մի հատվածն իրենց էր պատկանում, իրենք այդ մասում  ունեին հայկական եւ ռուսական կողմի հետ պայմանավորվածություն, որ պետք է որոշակի ներկայություն ունենային: Բայց որ կլինի այնպիսի իրավիճակ, որ իրենք կկանգնեցնեն երրորդ երկրից մեր երկիր մուտք գործող բեռնատարները և կստուգեն, ես նման բան չէի կանխատեսում»,- ասաց նա:

Հարցին, թե ո՞րը կարող է լինել սրա հետևանքը, ՔՊ-ական պատգամավորը պատասխանեց, որ հետևանքը կարող է լինել այն, որ մարդիկ պարզապես կփորձեն խուսափել այդ ճանապարհով Հայաստան ապրանքներ ներմուծելուց:

 

Նույն շարքից