Վարչապետ Նիկոլ Փաշինյանը չի կարծում, որ կարելի է դիտարկել ՀԱՊԿ-ից դուրս գալու հարցը։ Այս մասին նա հայտարարեց նոյեմբերի 23-ի առցանց մամուլի ասուլիսում։
Պատասխանելով ՀԱՊԿ-ից դուրս գալու հնարավորության մասին հարցին՝ Հայաստանի վարչապետն ասաց, որ չի կարծում, թե նման հանգամանքներ կարելի է դիտարկել։ Նա հիշեցրեց, որ ՀԱՊԿ-ը ենթադրում է ոչ միայն բազմակողմ ձեւաչափ, այլեւ Ռուսաստանի Դաշնության հետ աշխատանքի կարեւոր խողովակ եւ հարթակ։ Հայաստանը, որպես կազմակերպության նախագահ, պետք է ձգտի այնպես անել, որպեսզի ՀԱՊԿ-ը մեծացնի իր մասնակցությունը տարածաշրջանում անվտանգության ապահովմանը։
Միաժամանակ Փաշինյանը հայտարարեց, որ կան մի քանի կարեւոր փաստեր, որոնք ոչ թե պետք է քննադատել, այլ ընդունել որպես իրականություն։ Դա ՀԱՊԿ մի քանի երկրների մասնակցությունն է թյուրքական պետությունների կազմակերպությանը՝ համապատասխան ռազմավարություն ստորագրելով Թուրքիայի եւ Ադրբեջանի հետ։ Սա իրողություն է, որը չի կարող չազդել համատեքստի վրա, նշեց Փաշինյանը։
Միաժամանակ նա հայտարարեց, որ Ռուսաստանը Հայաստանի ռազմավարական դաշնակիցն է, եւ այդ գործընկերությունն անգնահատելի է։ Փաշինյանը շատ բարձր գնահատեց ռուս խաղաղապահների գործունեությունը։ Նա հայտարարեց, որ Ռուսաստանը ոչ թե Ադրբեջանի թշնամին է, այլ բարեկամն ու դաշնակիցը, ուստի փորձում է ոչ թե ուժային, այլ դիվանագիտական ճանապարհով լուծում փնտրել։ Փաշինյանի խոսքով՝ Հայաստանում չեն ուզում ուժային մեթոդներ, ոչ ոք չի ուզում, որ ՀԱՊԿ երկրներից որեւէ մեկը ներքաշվի պատերազմի մեջ։
Փաշինյանը կրկին հայտարարեց, որ Հայաստանը հետամուտ է լինելու իր իրավունքների եւ շահերի պաշտպանությանը, եւ այս հարցում չի սահմանափակելու իր գործողությունները տարբեր օրակարգերում եւ տարբեր հարթակներում՝ օգտագործելով համագործակցելու պատրաստակամությունը եւ այլ երկրների փորձը։