Հասարակություն 

Մանուել Պետրոսյանը՝ շախմատի Հայաստանի չեմպիոն

analitik.am

Գրոսմայստեր Մանուել Պետրոսյանը իր կարիերայում առաջին անգամ նվաճել է շախմատի Հայաստանի չեմպիոնի տիտղոսը՝ 11 տուրից հետո 8 միավորով միանձնյա գլխավորելով Հայաստանի տղամարդկանց 82-րդ առաջնության մրցաշարային աղյուսակը:

Վերջին՝ 11-րդ տուրում Պետրոսյանը հաղթանակ է տարել Արման Միքայելյանի նկատմամբ: Այս առաջնությունում երիտասարդ գրոսմայստերն ընդհանուր առմամբ տարել է 6 հաղթանակ, 4 պարտիա ավարտել է ոչ-ոքի և կրել միայն մեկ պարտություն:

Վաստակած 7,5 միավորով առաջնության արծաթե մեդալակիր է դարձել Հայկ Մարտիրոսյանը: Նա միայն լրացուցիչ գործակիցներով է գերազանցել նույնքան միավոր վաստակած Շանթ Սարգսյանին, որը, պարտության մատնելով Տիգրան Պետրոսյանին, դարձել է բրոնզե մեդալակիր:

6,5 միավորով 4-րդ հորիզոնականը զբաղեցրել է Սամվել Տեր-Սահակյանը. նա վերջին տուրում ոչ-ոքի է խաղացել Տիգրան Հարությունյանի հետ:

Հայաստանի՝ նախորդ տարվա չեմպիոն Հովհաննես Գաբուզյանն էլ 5-րդ հորիզոնականն է զբաղեցրել վաստակած 6 միավորով: Վերջին տուրում նա պետք է մրցեր Զավեն Անդրիասյանի հետ. մրցախաղը չի կայացել, և հաղթանակը շնորհվել է Գաբուզյանին: Անդրիասյանը քովիդով էր հիվանդացել. 6-րդ տուրից հետո նա դադարեցրել էր ելույթներն առաջնությունում:

Ավելի վաղ ավարտվել էր նաև շախմատի կանանց 77-րդ առաջնությունը։ Չեմպիոնի կոչումը նվաճել էր Մարիամ Մկրտչյանը: Արծաթե մեդալակիր էր դարձել Սուսաննա Գաբոյանը, իսկ լավագույն եռյակը եզրափակել էր Մարիա Գևորգյանը:

Նույն շարքից