Կամավոր ատեստավորման արդյունքում հավելավճար ստացող ուսուցչի դրույքաչափը 2022 թվականի մայիսի 1-ից սահմանվել է 200 հազար ՀՀ դրամ: Կամավոր ատեստավորման ծրագրով նախատեսված 30-50 տոկոս հավելավճարները կկիրառվեն նշված դրույքաչափի նկատմամբ:
Որոշումն ընդունվել է ՀՀ կառավարության այսօրվա նիստում: Հարցը զեկուցել է Կրթության, գիտության, մշակույթի և սպորտի նախարար Վահրամ Դումանյանը:
«Ատեստավորման ընթացքում հավաքած միավորներով և տարակարգի սանդղակի կիրառմամբ կամավոր ատեստավորման միջոցով ուսուցիչը կարող է ստանալ 400 հազար դրամ աշխատավարձ: Կամավոր ատեստավորման արդյունքում հավելավճար ստացող ուսուցչի նվազագույն աշխատավարձը կկազմի 260 հազար ՀՀ դրամ` հաշվի առնելով, որ սահմանված նվազագույն հավելավճարը 30 տոկոս է, առավելագույնը` 50 տոկոս»,- նշել է ԿԳՄՍ նախարարը:
2021 թվականի սեպտեմբերին կամավոր ատեստավորման փորձնական ծրագիրն իրականացվել է առաջին անգամ, որին սեփական նախաձեռնությամբ մասնակցել են 7-12-րդ դասարաններում դասավանդող «Հայոց լեզու և գրականություն», «Հայոց պատմություն», «Հանրահաշիվ», «Երկրաչափություն», «Ֆիզիկա», «Քիմիա», «Կենսաբանություն» և «Աշխարհագրություն» առարկաների ուսուցիչներ:
Ըստ հավաքած միավորների՝ սահմանվել է 30-50 տոկոս հավելավճար` կամավոր ատեստավորման արդյունքում 70 տոկոս և բարձր արդյունք ապահոված ուսուցիչների համար: Վահրամ Դումանյանը փաստել է, որ անգամ նշված հավելավճարների կիրառումից հետո կամավոր ատեստավորման միջոցով բարձրացված աշխատավարձը միցակցային չէր, քանի որ ուսուցչի միջին աշխատավարձը կազմում է 125 հազար դրամ, նվազագույն դրույքաչափը 108 հազար դրամ է սահմանված:
«Նշված հանգամանքները հաշվի առնելով` որոշվել է բարձր դրույքաչափ սահմանել իրենց մասնագիտական գիտելիքները կամավոր ատեստավորման միջոցով հավաստած ուսուցիչների համար:
2022 թվականի մարտին ԱԺ-ն ընդունեց «Հանրակրթության մասին» օրենքի փոփոխությունները, ըստ որոնց՝ կատարվում է կամավոր ատեստավորում անցած ուսուցիչների համար բարձր դրույքաչափի սահմանում»,- ընդգծել է Վահրամ Դումանյանը:
Որոշմամբ սահմանվել է նաև, որ 2022 թվականի մայիսից 2021 թվականին կամավոր ատեստավորման արդյունքում հավելավճար ստացող ուսուցիչների նկատմամբ ևս կկիրառվի բարձրացված 200 հազար ՀՀ դրամ դրույքաչափը` փորձնական ծրագրին մասնակցած ուսուցիչներին խրախուսելու նկատառմամբ։
Կարևորելով որոշումը` վարչապետ Նիկոլ Փաշինյանը նշել է, որ հանրային կյանքում առկա ցանկացած խնդրի հիմքում որակյալ կրթությունն է, և այդ համատեքստում առաջնային խնդիրներից մեկն ուսուցչի աշխատավարձը մրցակցային դարձնելն է` բարձրացնելու համար մասնագիտության գրավչությունը:
«Ուսուցիչն ինքը կարող է որոշել, թե ինչքան պետք է լինի իր աշխատավարձը: Նա այսօր հնարավորություն ունի, կամավոր կարգով իր մասնագիտական գիտելիքները հավաստելով, բարձրացնել սեփական աշխատավարձը` հասցնելով 400 հազար դրամի»,- նշել է վարչապետը` հավելելով, որ պետությունը շարունակելու է աշխատավարձի բարձրացման քաղաքականությունը:
Տեղեկացնենք, որ մայիսից կմեկնարկի սեփական նախաձեռնությամբ կամավոր ատեստավորման այս տարվա հայտագրումը: Բուն ատեստավորումը տեղի կունենա սեպտեմբերին, արդյունքները հայտնի կլինեն հոկտեմբերին:
