Դադիվանքի նախկին վանահայր Տեր Հովհաննես քահանա Հովհաննիսյանը միասնության կոչ է անում։
Oragir.news-ի հետ զրույցում Տերը Հովհաննեսը, պատասխանելով հարցին, թե ով է մեղավոր Լաչինի միջանցքի 3 գյուղերի՝ Աղավնոյի, Ներքին Սուսի և Բերձորի հանձնման համար, ասաց․ «Ես չեմ կարող պատասխանել այդ հարցին, բայց իմ կարծիքը կարող եմ ասել, որ բոլորիս մեղքն է, բոլորիս սխալն է, ու այսօր մենք այս իրավիճակում ենք։ Հայ ժողովուրդը այսպիսի իրավիճակում երբեք չի գտնվել, ես չեմ հասկանում՝ մենք մեր դիմակը բացեցի՞նք, թե՞ չէ։ Աստծուց հեռացել ենք, պետությունը եկեղեցուց անջատեցին, որ կարողանան իրենք իրենց գործն անել։ 2018 թվականից հետո Հայաստան աշխարհում սատանա է թագավորում, այդքան բան կարող եմ ասել»։
Հովհաննես քահանային հարցրինք՝ այս պահին հնարավո՞ր է իրավիճակը փրկել․ «Հնարավոր է, եթե ոտքի կանգնենք, միասնական լինենք, մեզ մաքրենք չարից, սատանայից, սատանային հեռացնենք իշխանությունից, հավաքվենք։ Թուրքը մնացել է թուրք, մենք ենք փոխվել։ Եթե մենք միասնական դառնանք, Աստծուն ճանաչենք, մոտենանք Աստծուն, ամեն ինչ իր տեղը կընկնի։ Ես այսօր ցավ եմ ապրում, շատ մեծ ցավ, ես չգիտեմ, թե ինչպես վերաբերվեմ այսօրվա իշխանավորներին, դավաճաններին, հողատուներին․․, չգիտեմ։ Պետք է արագ միասնական դառնանք, իշխանափոխություն լինի, որպեսզի կարողանանք երկիրը պահենք, թե չէ Հայաստանն էլ չի լինելու»։
Հիշեցնենք, որ Ադրբեջանը մինչև օգոստոսի 25-ը ժամանակ է տվել Աղավնոյի, Ներքին Սուսի և Բերձորի բնակիչներին՝ գյուղից հեռանալու համար։ Այդ որոշումը բնակիչներին էր փոխանցել Արցախի տարածքային կառավարման նախարար Հայկ Խանումյանը։
