ՀՀ նախկին գլխավոր դատախազ, քննչական կոմիտեի նախկին նախագահ Աղվան Հովսեփյանի փաստաբանները նրա կալանքը գրավով փոխարինելու միջնորդություն են ներկայացրել։
Վերաքննիչ քրեական դատարանում դատավոր Ռուբիկ Մխիթարյանի նախագահությամբ այսօր քննարկվել է Հովսեփյանի կալանքն անփոփոխ թողնելու` Երևանի ընդհանուր իրավասության որոշման դեմ պաշտպանների ներկայացրած բողոքը։ Հովսեփյանը ներկա չի եղել նիստին, նա «Իզմիրլյան» ԲԿ-ում է։
Փաստաբան Երեմ Սարգսյանը հայտնեց, որ Աղվան Հովսեփյանի առողջական վիճակը շատ ծանր է, և նրա կալանքն անհամատեղելի է առողջական վիճակի հետ։
«Ավելի քան մեկ ամիս է, որ Հովսեփյանի առողջական վիճակի փորձաքննություն է նշանակված, սակայն այն դեռ չի սկսվել, հիմա պետք է նոր փորձագետներ ներգրավվեն։ Հովսեփյանն ունի մշտական խնամքի կարիք, ուզում եմ հասկանալ` ինչի են սպասում փորձագետները»,–ասաց Սարգսյանը։
Նա նշեց, որ միջնորդում են կալանքը գրավով փոխարինել` գրավի չափը թողնելով դատարանի հայեցողությանը, բայց իրենք պատրաստակամ են մինչև 50 մլն դրամ վճարել։
Գործով դատախազներն առարկել են միջնորդությունը։
Դատարանը հեռացել է խորհրդակցական սենյակ, որոշումը կհրապարակվի վաղը` ժամը 9։30–ին։
