Թուրքիայի արտաքին գործերի նախարարությունը նոյեմբերի 21-ին ԱԳՆ-է կանչել Անկարայում Շվեդիայի դեսպան Ստաֆան Հերստրյոմին։
Այս մասին հայտնում է թուրքական «Անադոլու» լրատվական գործակալությունը:
Ըստ թուրքական աղբյուրի՝ դեսպանին ԱԳՆ կանչելու պատճառը եղել է օրեր առաջ Շվեդիայում Թուրքիայի դեսպանատան դիմաց ի պաշտպանություն «Քրդիստանի բանվորական կուսակցության» (PKK) տեղի ունեցած ակցիան:
Հաղորդագրության համաձայն՝ ակցիայի ժամանակ վիրավորական դրսևորումներ են եղել Թուրքիայի նախագահ Ռեջեփ Թայիփ Էրդողանի հասցեին:
Թուրքիայի ԱԳՆ-ն ընդգծել է, որ Անկարան ակնկալում է, որ «այս անընդունելի արարքի մեղավորները կբացահայտվեն և նրանց դեմ անհրաժեշտ միջոցներ կձեռնարկվեն»։
Դեսպանին ասվել է, որ թուրքական կողմը Շվեդիայից ակնկալում է նաև կոնկրետ քայլեր՝ Թուրքիայի, Շվեդիայի և Ֆինլանդիայի Եռակողմ հուշագրով նախատեսված պարտավորությունների շրջանակներում:
