Նիկոլ Փաշինյանը ստորագրել է Հայաստանի Հանրապետության պետական պահպանության ծառայության կանոնադրությունն ու կառուցվածքը հաստատելու մասին որոշումը։
Հայաստանի Հանրապետության պետական պահպանության ծառայությունը վարչապետին ենթակա և պետական պահպանություն իրականացնող մարմին է:
Ծառայության կառավարումն իրականացնում է վարչապետը: Վարչապետը հաստատում է ծառայության կանոնադրությունը, այդ թվում՝ կառուցվածքը և կատարում է կանոնադրության փոփոխություններ, ինչպես նաև՝ ծառայողների և աշխատողների քանակը, եթե օրենքով այլ բան նախատեսված չէ
Ծառայության նպատակներն ու խնդիրներն են պետական պահպանության օբյեկտներին սպառնացող վտանգի կանխատեսումը և բացահայտումը, սպառնալիքների կանխարգելման համար համալիր միջոցառումների իրականացումը, պետական պահպանության օբյեկտների անվտանգության ապահովումը և այլն։
Ծառայության ֆինանսավորումն իրականացվում է Հայաստանի Հանրապետության պետական բյուջեի, ինչպես նաև Հայաստանի Հանրապետության օրենսդրությամբ չարգելված այլ միջոցների հաշվին։
Մանրամասները՝ հավելվածում։
Հիշեցնենք՝ 2022 թվականի դեկտեմբերի 23-ին Ազգային ժողովն ընդունեց որոշում, որով ԱԱԾ պետական պահպանության ծառայությունը դարձավ վարչապետին ենթակա մարմին։
ՀՀ անվտանգության խորհրդի քարտուղար Արմեն Գրիգորյանը հայտարարել էր, որ ՊՊԾ-ում ատեստավորման ճանապարհով բոլորի աշխատավարձը մինչև հարյուր տոկոս կբարձրանա:
Նա նաև պարզաբանել էր, թե ինչու են ՊՊԾ-ն առանձնացնում ԱԱԾ-ից:
«ԱԱԾ-ին հնարավորություն ենք տալիս, որպեսզի վերջինս կենտրոնանա հիմնական երեք ուղղությամբ աշխատանքների վրա` հակահետախուզություն, ահաբեկչության դեմ պայքար և սահմանադրական կարգի պահպանություն»,- ընդգծել էր ԱԽ քարտուղարը: