Երևանի քաղաքապետարանում վերջին մի քանի գործակարգավարական նիստերի ժամանակ մի քանի անգամ հայտարարվեց այն մասին, որ Երևանն ազատվելու է Գազելներից: Դա դարձել էր նիստերի զարդ համարվող հարցերից մեկը, որը զեկուցվում էր առանձնահատուկ տոնական տոնայնությամբ՝ այն ներկայացնելով ավելի ճոխ, քան կներկայացվեր, օրինակ, նոր մայրացամաքի հայտնաբերումը: Սակայն, ինչպես պարզվում է, ամեն ինչ այդքան էլ լավ չէ, որքան սպասվում էր:
Արդեն մայիսի 29-ի գործակարգավարական նիստում պարզ դարձավ, որ Երևանը Գազելներից չի ազատվելու: Ավելին՝ նոր Գազելներ են բերվում, ուղղակի դրանք ոչ թե միկրոավտոբուս են, այլ՝ ավտոբուս: Այսինքն՝ մայրաքաղաքն ազատվելու է ոչ թե Գազել մակնիշի ավտոմեքենաներից, այլ այսօր շահագործվող Գազելներից: Չզարմանաք, եթե դա էլ չլինի ու պարզվի, որ դրանք շատ լավ վիճակում են:
Եվ մեկ հանգամանք, որը վերաբերում է արդեն ներմուծվող տրոլեյբուսներին: Մայիսի 15-ի գործակարգավարական նիստի ժամանակ ձախողված պարետ Տիգրան Ավինյանը, խոսելով ներմուծվող նոր տրոլեյբուսիների մասին, հայտարարեց, որ դրանք հնարավորություն կունենան ընդհանուր ցանցից անջատված քշել ևս 60 հավելյալ կիլոմետր նույն էլեկտրաավտոբուսների տրամաբանության ներքո: Դա նշանակում է, որ տրոլեյբուսների ցանցը մի փոքր ընդլայնվելու է, իր ուղին փոփոխվելու է որոշ չափով: Սակայն, այստեղ էլ են ստում: Բանն այն է, որ արդեն հաջորդ գործակարգավարական նիստում պարզվեց, որ այդ տրոլյեբուսները չեն կարող անել այն, ինչն ասել էր Ավինյանը: Նշվեց, որ տրոլեյբուսներն ընդհանոր ցանցից անջատված շարժվելու են ավելի քիչ, քանի որ 60 կմ-ն հնարավոր կլիներ ապահովել միայն այն դեպքում, եթե հովացման կամ ջեռուցման համակարգերն անջատված լինեն: Իսկ թե ինչպես է հնարավոր առանց հովացման կամ ջեռուցման համակարգի վարել, դա երևի միայն քաղաքապետարանում գիտեին:
Մի առանձին պատմություն է հանգստյան օրերին Երևանում տրանսպորտի աշխատանքը: Հատկապես կիրակի օրերին արդեն ժամը 19:00-ից հետո որոշ գծերում առհասարակ տրանսպորտ չես հանդիպի, կամ դրանք ժամանում են առնվազն 1 ժամ կտրվածքով: Բավարար է նստել երթուղային տրանսպորտ, այդ թվում՝ նոր ներկրված, որպեսզի հասկանաս, թե ինչ են մտածում մարդիկ Ավինյանի աշխատանքի մասին: Հանգստյան օրերին տրանսպորոտում Տիգրան Ավինյանն ամենաքննարկված անձն է, բնականաբար՝ ոչ լավ իմաստով:
Այս ամենը գալիս է ապացուցելու այն պնդումները, որ անկանոն կերպով ավտոբուսներ ներկրելն ո դրանցով Երևանի փողոցները լցնելը հարցի լուծում լինել չի կարող: Խնդիրը կարող է լուծվել միայն համակարգային առումով,սակայն Երևանի իշխանություններն ավելի շուտ խնդրի լուծման իմիտացիա են անում՝ փորձելով մինչև սեպտեմբեր, երբ կայանալու են ավագանու ընտրությունները, ցույց տալ, թե իբր լրջորեն զբաղվում են հարցով: